Landsorganisasjonen
Frå Wikipedia – det frie oppslagsverket
Landsorganisasjonen (LO) er den største hovudsamanslutninga av fagforbund i Noreg. Desse fagforbunda omfattar igjen ei rad fagforeiningar. I LO-familien er det 24 fagforbund, som til saman har 830 000 medlemmer.
Gerd-Liv Valla vart vald til den første kvinnelege leiaren av organisasjonen på LO-kongressen i 2001, og vart gjenvald på kongressen i mai 2005. Ho trakk seg 9. mars 2007 etter granskinga av Yssen-saka. Roar Flåthen er konstituert leiar.
Medlemskap i LO er ope for alle, same kva politisk syn dei har, men historisk er LO ein del av den sosialistiske arbeidarrørsla og har eit politisk program basert på sosialdemokratiske tankar.
Innhaldsliste |
[endre] Historie
Gjennom den industrielle revolusjonen på 1800-talet vart det skapt ei heilt ny samfunnsklasse; arbeidarklassa. Denne hadde i byrjinga få eller ingen rettar, og etter kvart vart trongen til organisering sterkare for å rette på dette. I 1870-åra såg dei første fagforeiningane dagens lys. LO vart stifta den 1. april 1899 under namnet «Arbeidernes faglige landsorganisasjon», som i 1957 endra namn til Landsorganisasjonen i Norge.
Dei første åra var dei viktigaste krava til fagrørsla 8 timars normalarbeidsdag og anerkjenning av organisasjonsretten og retten til kollektive tariffavtalar. Ikkje før Hovudavtalen kom i 1935, samtidig med at Johan Nygaardsvold skipa den første varige regjeringa utgått av DNA, vart det ordna tilhøve i heile arbeidslivet, der rettane og pliktene til motpartane vart slegne fast.
LO har alltid hatt sterke band til Arbeidarpartiet, tidlegare blant anna gjennom at fagforeiningar hadde kollektive medlemskap i DNA. Sjølv om dei formelle banda har blitt svakare har LO og AP framleis tette band, for eksempel ved LOs valkampbidrag og representasjon i AP sitt sentralstyre. Dette har blitt kritisert frå fleire hald.
[endre] Organisering
LO er ei hovudsamanslutning av ei rad fagforbund. Fagforbunda omfattar gjerne ei eller fleire yrkesgrupper; eit døme på dette er Hotell- og restaurantarbeidarforbundet. Enkelte fagforbund omfattar fleire yrke, til dømes Handel og Kontor i Noreg.
På den einskilde arbeidsplassen er arbeidstakarane organisert i klubbar, som i eit geografisk avgrensa område tilsaman utgjer ei fagforeining, og desse fagforeiningane er igjen medlem av dei landsomfattande fagforbunda. I alt er 24 ulike fagforbund tilslutta hovudsamanslutninga LO (sjå liste).
LO sine 800 000 medlemmar tilsvarer 35 % av lønnstakarane i landet. Avgjerdsorgana i LO-systemet består av Kongressen som møtest kvart fjerde år, representantskapet som møtest normalt to gonger årleg og sekretariatet som vanlegvis møtest kvar måndag. LO si valde leiing består av åtte personar. Desse opptrer på vegne av organisasjonen og medlemmene i kontakt med arbeidsgjevarane og styresmaktene.
[endre] Tillitsvalde pr. LOs kongress mai 2005
- Roar Flåthen – LO-leiar
- Geir Mosti – nestleiar
- Bente N. Halvorsen – hovudkasserar
- Ellen Stensrud – 1. sekretær
- Rita Lekang – LO-sekretær
- Tor Arne Solbakken – LO-sekretær
- Trine Lise Sundnes – LO-sekretær
Tidlegere kjente LO-leiarar:
- Gerd-Liv Valla – LO-leiar (trekte seg 9. mars i 2007)
- Yngve Hågensen
- Leif Haraldseth
- Tor Aspengren
- Konrad Nordahl
[endre] Medlemsforbund pr. februar 2006
- Arbeiderbevegelsens Presseforbund (APF)
- EL & IT Forbundet
- Fagforbundet
- Fellesforbundet
- Fellesorganisasjonen (FO)
- Forbundet for Ledelse og Teknikk (FLT)
- Handel og Kontor i Norge (HK)
- Hotell- og Restaurantarbeiderforbundet (HRAF)
- Musikernes fellesorganisasjon (MFO)
- Norges Offisersforbund (NOF)
- Norsk Arbeidsmandsforbund (NAF)
- Norsk Fengsels- og Friomsorgsforbund (NFF)
- Norsk Jernbaneforbund (NJF)
- Norsk Kjemisk Industriarbeiderforbund (NKIF)
- Norsk Lokomotivmannsforbund (N.L.F.)
- Norsk Nærings- og Nytelsesmiddelarbeiderforbund (N.N.N.)
- Norsk Olje- og Petrokjemisk Fagforbund (NOPEF)
- Norsk Post og Kommunikasjonsforbund
- Norsk Sjømannsforbund (NSF)
- Norsk Tjenestemannslag (NTL)
- Norsk Transportarbeiderforbund (NTF)
- Norsk Treindustriarbeiderforbund (N.T.A.F.)
- Norske Idrettsutøveres Sentralorganisasjon (NISO)
- Skolenes Landsforbund (SL)
