Tilla Lorenzen
Vun Wikipedia
Mathilde „Tilla“ Lorenzen (boren as’n Vette; * 1943 in Löwenstedtfeld; † 21. Juli 2004) weer en plattdüütsche Theaterfru.
Se is 1943 as Dochter vun en Buurn in Löwenstedtfeld boren un dor ok opwussen un op Volksschool wesen. Na en landwirtschaftliche Huuswirtschaftslehr hett se föffteihn Johr lang in’t Löwenstedter Depot in’t Büro arbeidt. 1978 hett se anfungen, för de Husumer Narichten to schrieven. Vör allen över de Bueree un den Peersport. Siet 1993 geev dat in dat Blatt en Sied för Plattdüütsch un Freesch un dor hett se denn ok vel för schreven. Bekannt worrn is se later vör allen ok mit de jungen Lüd ut Löwenstedt, bi de se siet 1985 de Baas weer. 1999 hett se den Hans-Momsen-Pries wunnen un 1995 tohoop mit de jungen Lüd ut Löwenstedt den Nedderdüütschen Literaturpries vun de Stadt Kappeln för Een lüdde verzauberte Fleut na Mozart sien Zauberflöte. 2001 harr se de Ehrennadel vun’t Land Sleswig-Holsteen kregen. Ok an de Grundschool in Viöl harr se en Theoter-AG opmaakt. In Viöl hett se ok den Viöler Pries mit anschaven.
Vun’n 12. Februar 2000 af an, also ganz vun Anfang an, weer se ok in’n Plattdüütschen Raat för Sleswig-Holsteen un dor een vun de Sprekers vun’n Raat.
Lorenzen is 2004 doodbleven, nadem se al en poor Johr lang Krebs harr. Se weer verheiraadt un harr twee Kinner.
[ännern] Warken
- Bi uns bi ’t Huus. Een Spill för junge Lüd. schräwen vun de jungen Lüd ut Löwenstedt. Rutgeven vun Tilla Lorenzen, Mahnke, Veern 1988
[ännern] Weblenken
- Indrag to den Schriever in de PBuB (hoochdüütsch)
