Escorial
Vun Wikipedia
El Escorial is en groot Slott, dat vun 1563 bit 1584 50 km noordwestlich vun Madrid boot wurr.
Dat ole Spanien, in dat Christen, Juden un Mauren in Freden mitnanner leevt harrn, weer vergahn. Toledo weer nich mehr Hööftstadt, do leet Philipp II. in dat Jahr 1563 den Grundsteen leggen vun El Escorial, en Slott, dat togliek Palast, Klooster, Mausoleum, Bibliothek un Seminar is.
Nadem Philipp an’n Laurentiusdag 1557 bi Saint Quentin de Franzosen överwunnen harr, harr he den hilligen Laurentius löövt, en Klooster, verbunnen mit ene Graffstell för de spaanschen Könige un enen Palast to boon. He soch enen Oort, vun woneem ut he Madrid överblicken kunn, un funn Escorial, wat Schlackenbarg bedütt.
De Bo duur över twintig Jahr. De Middelpunkt vun dat 207 m lange un 161 m brede Slott is de Kark. Vandage hett dat Geböde 300 Rüüm, 16 Hööv, 13 Krüüzgänge un 80 Springborns. De Besöker, de allens sehn wulln, mussen dör 1300 Dören un Korridoren von tosamen 16 km Längde gahn un kunnen dör 2700 Finster kieken.
Vun buten maakt dat Geböde enen unfründlichen Indruck. Dar is kien Vörgoorn un kien Orangenpatio, de graue Granit is nich verputzt. Man kann dat Bowark woll bewunnern, aver schöön finnen kann man dat nich.
