വി.സി. ശ്രീജന്‍
വിക്കിപീഡിയ, ഒരു സ്വതന്ത്ര വിജ്ഞാനകോശം.
മലയാളത്തിലെ പ്രമുഖനായ നിരൂപകനും താത്വികലേഖകനും. കേരള സര്‍ക്കാര്‍ സര്‍വ്വീസില്‍ കോളേജ് അദ്ധ്യാപകനായിരുന്നു. തലശ്ശേരിയിലെ ബ്രണ്ണന്‍ കോളെജില്‍ നിന്നും ഇംഗ്ലീഷ് വിഭാഗം റീഡറായി സര്‍വ്വീസില്‍ നിന്ന് റിട്ടയര്‍ ചെയ്തു. മലയാളത്തില്‍ 100-ഓളം ലേഖനങ്ങളും 11 പുസ്തകങ്ങളും ഇംഗ്ലീഷില്‍ 5 പ്രബന്ധങ്ങളും വി.സി. ശ്രീജന്‍ പ്രസിദ്ധീകരിച്ചിട്ടുണ്ട്.
ഉള്ളടക്കം |
[തിരുത്തുക] ജീവിതരേഖ
1951-ല്‍ ജനനം. വടകരയിലും മടപ്പള്ളി ഗവ. കോളേജിലും പഠനം. കാലിക്കറ്റ് സര്‍വ്വകലാശാലയുടെ തലശ്ശേരി സെന്ററില്‍ നിന്ന് ഇംഗ്ലീഷ് സാഹിത്യത്തില്‍ മാസ്റ്റര്‍ ബിരുദവും പിന്നീട് ഡോക്ടറേറ്റും. കോളേജ് വിദ്യാര്‍ത്ഥിയായിരിക്കെ തന്നെ സാഹിത്യത്തിലും അതോടൊപ്പം രാഷ്ട്രീയത്തിലും സജീവമായി പ്രവര്‍ത്തിച്ചു. സി.പി.ഐ(എം.എല്‍)ന്റെ കോഴിക്കോട് ജില്ലാ കമ്മിറ്റിയംഗമായിരുന്നു. അടിയന്തരാവസ്ഥയുടെ തൊട്ട് മുമ്പ് പ്രസിദ്ധീകരിച്ച യെനാന്‍ മാസികയുടെ പത്രാധിപരായിരുന്നു. അടിയന്തരാവസ്ഥാകാലത്ത് അറസ്റ്റ് ചെയ്ത് തടവിലാക്കപ്പെട്ടു. എങ്കിലും വൈകാതെ സ്വതന്ത്രനാക്കപ്പെട്ടു.
[തിരുത്തുക] ആദ്യകാല നിരൂപണങ്ങള്‍
മാര്‍ക്സിസം-ലെനിനിസത്തിന്റെ സ്വാധീനത്തിലാണ് സാഹിത്യ നിരൂപകനായി വി.സി.ശ്രീജന്‍ രംഗപ്രവേശം ചെയ്യുന്നത്. അസ്തിത്വവാദാത്മകമായ ആധുനികതയുടെ വിമര്‍ശകനായി ദേശാഭിമാനി വാരികയില്‍ മാര്‍ക്സിസത്തിന്റെ താത്വികതലത്തില്‍ നിന്ന് എഴുതിയ ലേഖനം ശ്രദ്ധേയമായ ആദ്യനിരൂപണമാണ്. ആധുനികതയുടെ തത്വശാസ്ത്രത്തിനെതിരെ ഫലപ്രദമായ വിമര്‍ശനം നടത്തുന്നതിനു പകരം വൈദേശിക ഇറക്കുമതി,ദുര്‍ഗ്രഹത എന്നിങ്ങനെയുള്ള ആക്ഷപങ്ങളായിരുന്നു വ്യവസ്ഥാപിത ഇടതുപക്ഷ നിരൂപകര്‍ ഉന്നയിച്ചിരുന്നത്. പുരോഗമനസാഹിത്യകാരന്മാര്‍ നടത്തിയ അകക്കാമ്പില്ലാത്ത ഇത്തരം വിമര്‍ശനത്തില്‍ നിന്ന് വ്യത്യസ്തമായ ഈ ലേഖനം ശ്രീജന്റെ പില്‍ക്കാല കൃതികളിലൊന്നും എടുത്തു ചേര്‍ത്തിട്ടില്ല. ആധുനികതയുടെ അസ്തിത്വവാദപരമായ അടിത്തറ പില്‍ക്കാല ലേഖനങ്ങളിലും ശ്രീജന്‍ പരിശോധനാവിധേയമാക്കുന്നുണ്ട്. ആധുനികോത്തരം:വികലനവും വിശകലനവും എന്ന പുസ്തകം ഇതിന് തെളിവാണ്.
[തിരുത്തുക] നിരൂപകന്റെ മൌനം
അടിയന്തിരാവസ്ഥ, യെനാന്‍ പ്രസിദ്ധീകരണം, തുടര്‍ന്നുള്ള സംഭവങ്ങള്‍ എന്നിവ ഒരു നിരൂപകന്‍ എന്ന നിലയില്‍ പുനര്‍വിചിന്തനത്തിന് ശ്രീജനെ പ്രേരിപ്പിച്ചു. ഭാരതീയദര്‍ശനം, മലയാള നിരൂപണപൈതൃകം എന്നിവയെക്കുറിച്ചുള്ള പഠനം ഈ കാലയളവില്‍ നിരൂപകന്‍ എന്ന നിലയില്‍ ഇദ്ദേഹത്തിന്റെ നിലപാടുകള്‍ അഴിച്ചു പണിതു. മാര്‍ക്സിസം ഒരു തത്വശാസ്ത്രം എന്ന നിലയിലും അതിന്റെ കലാദര്‍ശനം വിശേഷിച്ചും ഈ കാലയളവില്‍ പഠന വിധേയമായി. യോജിപ്പുകളുടേയും വിയോജിപ്പുകളുടേയും മേഖലകള്‍ തിരിച്ചറിഞ്ഞ വ്യക്തമായ കാഴ്ചപ്പാടുള്ള നിരൂപകനായി ഇദ്ദേഹം രൂപപ്പെടുന്നതില്‍ പ്രധാന പങ്ക് ഈ നിശ്ശബ്ദഘട്ടത്തിനുണ്ട്.
യാ ദേവീ സര്‍വ്വഭൂതേഷു എന്ന പഠനത്തോടെയാണ് നിശ്ശബ്ദഘട്ടത്തില്‍ നിന്ന് ശ്രീജന്‍ തിരിച്ചു വരുന്നത്. കലാകൌമുദി വാരികയില്‍ ഖണ്ഡശ്ശ പ്രസിദ്ധീകരിച്ച ഈ പഠനം പിന്നീട് പുസ്തകരൂപത്തില്‍ പ്രകാശിതമായിട്ടുണ്ട്.
[തിരുത്തുക] വൈരുദ്ധ്യാധിഷ്ഠിത ഭൌതികവാദ വിമര്‍ശസംഗ്രഹം
യാ ദേവീ സര്‍വ്വഭൂതേഷുവിനു ശേഷം പ്രസിദ്ധീകരിക്കപ്പെട്ട പ്രധാന രചന വൈരുദ്ധ്യാധിഷ്ഠിത ഭൌതികവാദവിമര്‍ശസംഗ്രഹം ആയിരുന്നു. മാര്‍ക്സിസത്തിന്റെ അടിസ്ഥാന പരികല്പനകള്‍ വിമര്‍ശനവിധേയമാക്കുന്ന നാന്നൂറ് വാദമുഖങ്ങളാണ് ഈ പഠനത്തില്‍ ശ്രീജന്‍ അവതരിപ്പിച്ചത്. വിജ്ഞാനകൈരളി മാസികയില്‍ ഖണ്ഡശ്ശയായി ഈ പഠനം പ്രസിദ്ധീകരിക്കകയായിരുന്നു. തത്വശാസ്ത്രപരമായി മാര്‍ക്സിസത്തിലുള്ള വിശ്വാസരാഹിത്യം തുറന്നു പ്രകടിപ്പിച്ച, ഇതിനു സദൃശമായ, മറ്റൊരു ഉദാഹരണം കേരളീയബുദ്ധിജീവികളുടെ കാര്യത്തില്‍ വേറെ കാണിക്കുവാനില്ല. കിഴക്കന്‍ യൂറോപ്പിലെ കമ്യൂണിസത്തിന്റെ പതനം സംഭവിക്കുന്നത് ഈ കാലയളവിലാണ്. ആഗോളതലത്തില്‍ ഒരു ദര്‍ശനം എന്ന നിലയില്‍ മാര്‍ക്സിസം കാലഹരണപ്പെട്ടതാണെന്ന തിരിച്ചറിവില്‍ നിന്നാണ് ഉത്തരാധുനികതയെക്കുറിച്ചുള്ള ശ്രീജന്റെ പഠനങ്ങള്‍ ആരംഭിക്കുന്നത്.
[തിരുത്തുക] ഉത്തരാധുനികതാ നിരൂപണം
[തിരുത്തുക] കൃതികള്‍
[തിരുത്തുക] മലയാളം കൃതികള്‍
- യാ ദേവീ സര്‍വ്വഭൂതേഷു
- ചിന്തയിലെ രൂപകങ്ങള്‍ (1991)
- പ്രവാചകന്റെ മരണം (1993)
- കഥയും പ്രത്യയശാസ്ത്രവും (1993)
- വാക്കും വാക്കും (1996)
- അര്‍ത്ഥാന്തരന്യാസം (1999)
- ആധുനികോത്തരം: വിമര്‍ശനവും വിശകലനവും (1999)
- വിമര്‍ശനാത്മക സിദ്ധാന്തം (1999)
- നോവല്‍വായനകള്‍ (2003)
- പ്രതിവാദങ്ങള്‍ (2004)
- അര്‍ത്ഥവാദങ്ങള്‍ (2006)
[തിരുത്തുക] സമാഹരണം
- മഞ്ജരി (വി.ടി.കുമാരന്റെ ഉപന്ന്യാസങ്ങള്‍),ആമുഖത്തോടെ
[തിരുത്തുക] ഇംഗ്ലീഷ് കൃതികള്‍
- ഒബ്സ്ക്യൂര്‍ കാമെറാസ്: ദ് അണ്‍കോണ്‍ഷ്യസ്, ഐഡിയോളജി ആന്റ് മെറ്റാഫോര്‍ .JICPR വാല്യം.XVI.നമ്പ്ര 2.
- ഫീല്‍ഡ്സ്, മാട്രിസെസ് ആന്റ് ഓര്‍സ്-റ്റെക്സ്റ്റ് CURJ ഏപ്രില്‍ 2000
- സാന്‍സ്ക്രിറ്റ്, ഇന്ദുലേഖ ആന്റ് ഇംഗ്ലീഷ്. ദ് ഏര്‍ളി നോവത്സ് ഇന്‍ ദ് സൌത്ത് ഇന്ത്യന്‍ ലാങ്ഗ്വജസ്. എഡിറ്റര്‍: ശങ്കരന്‍ രവീന്ദ്രന്‍. കോഴിക്കോട് സര്‍വ്വകലാശാല 2000.
- സൈന്‍സ് ടേക്കണ്‍ ഫോര്‍ സിഗ്നിഫൈയേര്‍സ് .ഹരിതം 13(2001).
- രസ: ദ് കണ്‍സ്പ്റ്റ് ആന്റ് ഫിഗര്‍ .CURJ Feb.2003.
- ഏസ്തെറ്റിക്സ് ആന്റ് മെറ്റഫോര്‍. പ്രസിദ്ധീകരിക്കാത്ത പി.എച്.ഡി. പ്രബന്ധം. കോഴിക്കോട് സര്‍വ്വകലാശാല 1993.
[തിരുത്തുക] പുരസ്കാരങ്ങള്‍
- സി.ബി. കുമാര്‍ എന്‍ഡോവ്മെന്റ് (2003), കേരള സാഹിത്യ അക്കാദമിയുടെ സാഹിത്യ നിരൂപണത്തിനുള്ള പുരസ്കാരം (2006) എന്നിവ ലഭിച്ചെങ്കിലും നിരസിച്ചു.
- നിരൂപകനും ചലച്ചിത്രനടനുമായ നരേന്ദ്രപ്രസാദിന്റെ ഓര്‍മ്മയ്ക്ക് സ്ഥാപിച്ച നരേന്ദ്രപ്രസാദ് പുരസ്കാരം സാഹിത്യനിരൂപണത്തിന് 2007 ല്‍.
[തിരുത്തുക] ആധാരസൂചിക
[തിരുത്തുക] കുറിപ്പുകള്‍
- http://en.wikipedia.org/wiki/V._C._Sreejan വി.സി.ശ്രീജനെക്കുറിച്ചുള്ള ഇംഗ്ലീഷ് വിക്കിപീഡിയ ലേഖനം
 |
ഈ ലേഖനം അപൂര്‍ണ്ണമാണ്. ഇതു പൂര്‍ത്തിയാക്കുവാന്‍ സഹകരിക്കുക. |
