കേരള സാഹിത്യ അക്കാദമി
വിക്കിപീഡിയ, ഒരു സ്വതന്ത്ര വിജ്ഞാനകോശം.
മലയാളഭാഷയെയും അതിന്റെ സാഹിത്യപൈതൃകത്തെയും സംരക്ഷിക്കാനും പ്രോത്സാഹിപ്പിക്കാനും സ്ഥാപിച്ച ഒരു സ്വയംഭരണ സ്ഥാപനമാണ് കേരള സാഹിത്യ അക്കാദമി (ആംഗലേയം:Kerala Sahitya Akademi, Academy for Malayalam literature). തിരുവിതാംകൂര് മഹാരാജാവായിരുന്ന ശ്രീ ചിത്തിര തിരുന്നാള് ബാലരാമവര്മ്മയാണ് 1956 ഒക്റ്റോബര് 15-ന് അക്കാദമി ഉദ്ഘാടനം ചെയ്തത്. കേരള സര്ക്കാര് സാമ്പത്തിക സഹായം ചെയ്യുന്നുണ്ടെങ്കിലും അക്കാദമിയുടെ ഭരണഘടനാപ്രകാരം അക്കാദമി ഇപ്പോഴും സ്വയംഭരണ സ്ഥാപനമായി തന്നെ നിലകൊള്ളുന്നു.
1956-ല് തിരുവനന്തപുരത്ത് കനകക്കുന്ന് കൊട്ടാരത്തില് രൂപീകരിച്ച കേരള സാഹിത്യ അക്കാദമി 1958-ല് തൃശൂരിലേക്ക് മാറ്റി. സാഹിത്യകാരന്മാരുടെ സ്മരണയ്ക്കായി ഏര്പ്പെടുത്തിയ പോര്ട്രെയ്റ്റ് ഗാലറിയും പ്രശസ്തരുടെ ശബ്ദം ആലേഖനം ചെയ്ത കാസറ്റ് ലൈബ്രറിയും അക്കാദമിയിലുണ്ട്. കേരള, കാലികറ്റ്, മഹാത്മാഗാന്ധി, കാലടി ശ്രീ ശങ്കരാചാര്യ സര്വകലാശാലകളുടെ പി.എച്ച്.ഡി. ഗവേഷണ കേന്ദ്രമാണ് ഈ ലൈബ്രറി.