Стојан Андов

Од Википедија, слободна енциклопедија

Стојан Андов (роден 30 ноември 1935 во Кавадарци) е претседател на Либералната партија на Македонија и поранешен претседател на Собранието на Република Македонија.

Дипломирал на Економскиот факултет во Скопје, а магистрирал на Белградскиот универзитет. Бил потпретседател на Републичкиот извршен совет, член на македонската делегација во Соборот на републиките и покраините и член на федералната влада во три мандати, во кое својство учествуваше во преговорите на поранешна Југославија со експертите на ЕЕЗ (1971-1987). Бил амбасадор на поранешна Југославија во Ирак (1987-1991).

Основач е на Либералната партија и како нејзин претседател ја водеше Либералната партија до спојувањето со поранешната Демократска партија во 1997, кога стана претседател на Советот на Либерално демократската партија. На претседателските избори во 1999 година беше кандидат на ЛДП за Претседател на Република Македонија.

По обновувањето на Либералната партија на Македонија во 1999 година беше избран за член на нејзиниот Извршен комитет, а на Седмиот (Вонреден) конгрес на ЛПМ во јуни 2001 година беше избран за претседател на партијата. На Осмиот Конгрес во јули 2004 година повторно беше избран за претседател на партијата.

Претседател на Собранието беше во два наврати: од 1991 до 1996 и од ноември 2000 до септември 2002 година.

Избиран е за потпретседател на Либералната интернационала.