Adiss
Da Wikipedia.
 |
Quest articol chì l'è assee ben faa e l'è mia de trà via | |
 |
Cheest artícul al è scrivüü in koiné uçidentala, urtugrafía ünificada. |
L'Adiss l'è un fiümm de l'Itàlia del nòort; ul sò basin imbrìfer al gh'a una süperfiis de 12.100 km² e al quata praticameent tüta la regjun del Trentin-Süüt Tiröö e un tocch del Veneto meridiunaal. Ul fiümm a l'è ul segunt in Itàlia per lünghèzza, cunt 409 km.
Al nass areent al Pass de Résia, dal laach artificjaal cunt l'istèss nòmm, in Süüt Tiröö, e al cumencja a curr (primm inver süüt, pöö dopu inver est) in de la Val Venusta passandich areent a Meran. Dopu un quaj chilometer, propi tacaa a Bulzan, a l'è ingrussaa da l'Isarch e al gira ammò inver süüt; al bagna Salurn (ul limit püssee meridiunaal de l'area germanica in Europa), Treent e Ruvereet primm de rivà a la pianüra, dumé puch chilometer a urieent del Laach de Garda. Da chì al curr cun direzziun est (u südèst), al bagna Veruna e Legnaach e al marca gju ul cunfin setentriunaal de la pruvincja de Ruviich. Al sa trà deent in del Maar Adriatich, in lucalitaa Rusulina Maar, areent a Chiògja.
