Tim Berners-Lee

Van Wikipedia

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.

Sir Tim Berners-Lee (Londe, 8 juni 1955) weurt gezeen es de bedènker en gróndlègker van 't World Wide Web (WWW) tesame mèt Robert Cailliau.

[bewirk] Leve en carrière

Ièrsjte webserver van Tim Berners-Lee

Berners-Lee woort gebore in Londe. Hae sjtudeerde aan 't Queen's College, ein onderdeil van de Universiteit van Oxford. Hae wèrkde es sofwareprogrammäör bie versjillende bedrieve.

In 1980 bedach hae ein systeem op basis van hypertext, öm 't deile en biehouwte van informatie tösje ónderzeukersj mekkeliker te make. Same mèt Robert Cailliau bedach 'r 'n prototype van 't systeem, Enquire. In 1988 gebruukde hae zien ideeë van Enquire veur 't ontwerpe van 't World Wide Web. Hae boewde doe ouch de ièrsjte webbrowser, dae ouch World Wide Web heesj, en de ièrsjte webserver. Berners-Lee vroog gein patent aan veur zien ideeë, meh goof ze vrie.

De ièrsjte website die Berners-Lee boewde (dit waor dus ouch de ièrsjte website), waor http://info.cern.ch/ (de site besjteit neet miè, meh ein archiefversie hievan ies hie te zeen). De site woort op 6 augustus 1991 online gezat. Ze goof oetlègk euver wat 't World Wide Web ies en wie me eine browser koes gebruke.

In 1994 sjtiechde Berners-Lee 't World Wide Web Consortium (aafkorting: W3C) aan 't Massachusetts Institute of Technology. Hieïn woorte versjillende organisaties vereinig die sjtandaarde en aanbevelinge öm 't Internet te verbetere wolle make. In 1996 woort door W3C de sjtandaard Cascading Style Sheets gelanceerd. Pas vanaaf 2000 begoeste populair browsers deze sjtandaard te gebruke.

In 2004 woort hae professor aan de Universiteit van Southampton. Hae wèrk dao aan 't semantisch web, zien nuujste projek. 't Semantisch web ies 'n vervolg op 't World Wide Web, woain de informatie zoa geannoteerd ies dat zie ouch door mesjiene te leze ies. Zoa kènne automatisch relaties tösje documente gelag were. In de academische waereld ies hie väöl aandach veur, meh 't ies nog óndudelik of 't ouch daoboete succes zal kriege.

[bewirk] Erkènning

Berners-Lee kreeg versjillende pries en óndersjeiinge, zoawie de Japanpries van 2002 en de Millennium Technology Prize 2004. Op 16 juli 2004 woort hae tot ridder gesjlage door Keuningin Elizabeth II van 't Vereinig Keuninkriek. Hae kreeg de titel van Knight Commander, de twiède hoagste rank in de Orde van 't Britse riek.

[bewirk] Wirke

Spinning the Semantic Web: Bringing the World Wide Web to Its Full Potential Tim Berners-Lee (Foreword), Dieter Fensel (Editor), James Hendler (Editor), Henry Lieberman (Editor), Wolfgang Wahlster (Editor) (The MIT Press, 2005) ISBN 026256212X
Weaving the Web: Origins and Future of the World Wide Web, Tim Berners-Lee (Texere Publishing, 1999) ISBN 0752820907