Victor Hugo

Vu Wikipedia, der fräier Enzyklopedie.

Buste vum Victor Hugo vum Rodin op der Bréck am Stadzentrum vu Veianen

De Victor Marie Hugo (gebuer de 26. Februar 1802 zu Besançon, gestuerwen den 22. Mee 1885 zu Paräis) war e franséischen Auteur, dee sech säi ganzt Liewe laang fir e friddlecht a vereenegt Europa, géint d'Sklaverei a fir d'Mënscherechter engagéiert huet.

E war doriwwer eraus staark un der Konscht interesséiert, virun allem un der Molerei an un der Fotografie, déi wichteg Niewenbeschäftigungen fir hie waren.

Inhaltsverzeechnis 1 Säi Liewen 2 Wichtegst Etappen zu Lëtzebuerg 3 Wichtegst Wierker 4 Bibliographie 5 Um Spaweck

[Änneren] Säi Liewen

Schonns mat 17 Joer huet en 1818 eng literaresch Zäitschrëft gegrënnt, de Conservateur littéraire, vun där 30 Nummere bis 1821 erauskoumen Säin éischte Roman, Bug Jargal, koum am Joer 1820 eraus.

1841 gouf hien an d'Académie française gewielt. Nom Coup d'Etat vum Louis-Napoléon Bonaparte den 2. Dezember 1851 goung de Victor Hugo an den Exil, eréischt 19 Joer méi spéit koum hien 1870 op Paräis zréck.

Am Exil huet hie virun allem zu Jersey a Guernsey gewunnt, zu Bréissel publizéiert a war stänneg queesch duerch Europa ënnerwee. Dobäi koum en och op Lëtzebuerg.

"La maison que j’habite au coin du pont", 28 Juli 1871, Zeechnung vum Victor Hugo

[Änneren] Wichtegst Etappen zu Lëtzebuerg

• 1862 huet de Victor Hugo Lëtzebuerg fir d'éischte Kéier (Klierf, Veianen, Iechternach, d'Fiels an d'Stad Lëtzebuerg) besicht.
• 1863 war en zu Miersch, an der Fiels, der Stad Lëtzebuerg, zu Iechternach, Veianen, Falkesteen, Klierf.
• 1864 koum en nach emol an d'Fiels an an d'Stad Lëtzebuerg.
• 1865 huet hien Iechternach, Veianen, Buerschent a Klierf besicht.
• Am Summer 1871 huet de Victor Hugo sech fir e puer Méint zu Veianen établéiert, an deem Haus wou haut e Musée iwwert hie ka besicht ginn.

Wärend senge Reesen duerch Lëtzebuerg huet de Victor Hugo am Ganzen eng 50 Gedichter geschriwwen an eng 60 Zeechnungen an Aquarelle gemoolt.

1935 gouf de 50. Anniversaire vum Hugo sengem Doud gefeiert. Zu Veianen gouf e Musée an eng Buste (geschafe vum Auguste Rodin) ageweit.

2002, fir den 200. Gebuertsdag vum Victor Hugo, gouf zu Veianen no 3 Joer Ëmbauaarbechten de renovéierte Musée littéraire Victor Hugo nees fir de Public opgemaach. De lëtzebuergeschen Auteur a Literaturkritiker Frank Wilhelm, ee Victor-Hugo-Spezialist, huet d'Muséographie vum renovéierte Musée opgestallt.

Laascht dem Läichewee vu Biwels op de Niklosbierg gouf op där Plaatz e "Point de vue" ageriicht, vun wou aus de Victor Hugo d'Méander vun der Our tëschend Veianen a Stolzebuerg gemoolt huet.

Point de vue Victor Hugo bei Biwels am Ourdall

[Änneren] Wichtegst Wierker

• Han d'Islande (1823),
• Hernani (1830),
• Les Misérables (1862),
• Notre-Dame de Paris (1831),
• Les Contemplations (1856),
• La Légende des Siècles (1856-1883),
• Les Travailleurs de la mer (1866),
• L'homme qui rit (1869),
• Quatrevingt-treize (1874),
• L'Art d'être grand-père (1877).

[Änneren] Bibliographie

• Bourg, Tony & Wilhelm, Frank, 1985. Le Grand-Duché de Luxembourg dans les Carnets de Victor Hugo. RTL Edition, Luxembourg.
• Feller, Martin, 1988. Der Dichter in der Politik. Victor Hugo und der deutsch-französische Krieg von 1870/71. Untersuchungen zum französischen Deutschlandbild und zu Hugos Rezeption in Deutschland. Thèse, Marburg.
• Wilhelm, Frank, 2000. Victor Hugo et l’Idée des États-Unis d’Europe. Association des amis de la maison de Victor Hugo à Vianden, Vianden. 98p.

[Änneren] Um Spaweck

• "Musée littéraire Victor Hugo" zu Veianen (fr)