Kommunismus
Vu Wikipedia, der fräier Enzyklopedie.
Kommunismus ass eng ökonomesch a sozial Theorie vun enger Gesellschaft ouni Klassen, an deer jiddereen dselwecht fir seng Aarbecht entlount gëtt an an deer d'Mënschen hir Talenter zum Wuel vun der Allgemengheet asetze sollen. Et soll also eng sozial Gläichstellung vun alle Mënsche ereescht ginn, andeems jiddereen no senge Moyenen e wirtschaftleche Bäitrag leescht, deen dann ënnert der Bevëlkerung no den eenzelne Besoine verdeelt gëtt. Et ass dëst eng Utopie, déi wéinst der Schwächt vun de Mënschen net als Politik an d'Praxis ëmgesat ka ginn. An deem Kontext ass och ze bemierken, datt et an all de sougenannte kommunistesche Staaten wéi z.B. Kuba ni Kommunismus gouf respektiv gëtt, mee just eng extrem Form vu Sozialismus, déi déi éischt Etapp a Richtung Kommunismus duerstellt.
Sozialkritik a kommunistesch Experimenter gouf et schonns an der Antikitéit an am Mëttelalter, mee eréischt d'Opklärung an de revolutionäre Geescht Enn dës 18. an am 19. Joerhonnert hunn eng ganz Rëtsch vu gréissere politeschen Antikapitalismusmouvementer ervirbruecht. Besonnesch ervirzehiewen sinn do dem Karl Marx a Friedrich Engels hiert 1848 zu London verëfffentlecht Kommunistescht Manifest an dem Marx säi Kapital vun 1867. Dës Wierker enthalen eng Etude vun den deemolege Liewensverhältnisser a vum Kapitalismus a schléisse mat der Fuerderung, de Kapitalismus ofzeschafen an duerch nei kommunistesch Liewensverhältnisser ze ersetzen, fir esou alle Klassekämpf en Enn ze setzen.
Op dëser Basis hu sech eng ganz Rei Couranten entwéckelt, dorënner de Marxismus, de Leninismus, de Luxemburgismus, de Stalinismus, de Trotzkismus, den Titoismus, de Maoismus etc. Mat der russescher Oktoberrevolutioun 1917 an der Schafung vun der Sowjetunioun koum et dann och zum éischte sougenannte kommunistesche Staat, deem China, Nordkorea, Vietnam, Angola a Kuba nokomme sollten.
Spéitstens mat der Opléisung vun der Sowjetunioun 1991 wéinst onauswäichleche wirtschaftleche Problemer huet sech déi praktesch Ëmsetzbarkeet vum Kommunismus awer als Illusioun erwisen.
[Änneren] Kuckt och
