Erich Maria Remarque
Vu Wikipedia, der fräier Enzyklopedie.
Den Erich Maria Remarque, gebuer den 22. Juni 1898 zu Osnabrück a gestuerwen de 25. September 1970 zu Locarno, war een däitsche Schrëftsteller.
Den Erich Maria Remarque huet sech 1916 direkt nodem hien d'Schoul ofgeschloss hat, fräiwëlleg als Zaldot fir un d'Front gemeld.
Nom Éischte Weltkrich huet hien den internationale Bestseller (den och verfilmt gouf) Im Westen nichts Neues geschriwwen. Ënner dësem ironeschen Titel, den op déi monton Floskel vu ville Krichsrapporte Allusioun mecht, huet de Remarque an enger drastescher Zaldotesprooch an op eng realistisch Manéier seng Krichserliewnisser erzielt. Domat huet hien indirekt déi dem Vollek ëmmer erëm ageriedte Propaganda vum éierevollen Heldendoud entlarvt. Obwuel hie mat sengem Roman - zuminbdest esou huet de Remarque behaapt - net ukloe wollt a grondsëtzlech Froen ausgeklammert huet, hat de batteren Toun vu senger Hoffnungslosigkeet awer eng politesch Wierkung.
Vun 1930 un huet de Remarque an der Schwäiz geliewt.
1933 hunn d'Nationalsozialisten dem Remarque seng Bicher wéint Verrot um Vaterland an den Zaldoten verbrannt.
1938 gouf him och déi däitsch Nationalitéit entzunn.
1939 ass hien an Amerika ausgewandert, wou hien 1947 déi US-amerikanesch Biergerrechter kritt huet.
E weidere groussen Erfolleg vum Remarque war säi Roman Arc de Triomphe den hien 1946 erausbruecht huet.
