Kangilinnguit
Úr Wikipediu, frjálsa alfræðiritinu
Hnit: 61°14′ N 48°06′ V
Kangilinnguit, á dönsku: Grønnedal, eldri grænlensk stafsetning Kangilínguit) liggur við Arsukfjörð í sveitarfélaginu Ivittuut á Suðvestur-Grænlandi. Íbúar eru um 200 og af þeim um 150 danskir hermenn. Hér er aðalbækistöð danska sjóhersins við Grænland (Grønlands Kommando) og landhelgisgæslunnar. Stöðin var upphaflega byggð af bandaríska sjóhernum 1943 til að vernda krýolítnámurnar í Ivittuut. Danir yfirtóku stöðina 1951. Frá Kangilinnguit er 6 km vegarspotti til Ivittuut en námunum þar var lokað 1987.
Fyrir náttúruunnendur er margt að sjá í umhverfi Kangilinnguit. Danska nafnið er sannefni á sumrin enda liggur stöðin í skjóli frá köldu hafi langt inn í landi og þó langt frá jöklum af Grænlandi að vera. Við Arsukfjörð er meðal annars mjög mikið af haförnum og sauðnautum. Um 90 mismunandi tegundir málma og steinda hafa fundist á svæðinu.
Áætlunarflug með þyrlu til og frá Narsarsuaq er einu sinni í viku og sömuleiðis með strandferðarskipi til og frá Paamiut.
