Albert Camus
Manipud iti Wikipedia
| Albert Camus |
|---|
Albert Camus, 1957
|
| Naipasngay |
| Noviembre 7, 1913 Mondovi, Algeria |
| Pimmusay |
| Enero 4, 1960 Villeblevin, Francia |
Ni Albert Camus (Noviembre 7, 1913 – Enero 4, 1960), mannurat ken filosopo a Franses, ket maysa kadagiti kangrunaan ken kalatakan a nangidur-as iti filosofia iti existensialismo (kaduana ni Jean-Paul Sartre). Isu ti maikadua a kaubingan a nangabak iti prestihioso a Premio Nobel iti Literatura (ni Rudyard Kipling iti kaubingan) idi maawatna daytoy a gunggona idi 1957.
Linaon |
[baliwan] Kabibiag
Naipasngay ni Camus idiay Mondovi, Algeria iti maysa a familia a Franses a nagtalinaed idiay Algeria. Ni nanangna, maysa nga Espaniola. Ni tatangna, maysa a Franses, ket natay idi 1914, iti Umuna a Gubat Sangalubongan a kas soldado. Dimmakkel ni Camus iti napanglaw a purok iti ciudad ti Algiers sakbay a napan nagbasa idiay Universidad ti Algiers, a nangturposanna iti filosofia.
Nagbalin a kameng isuna iti partido a komunista idiay Francia idi 1934 (a ginubya ti panakabangon ti govierno ni Francisco Franco iti Espania) ken iti partido a komunista iti Algiers idi 1936. Nagbalin a mannurat isuna iti maysa pagiwarnak a socialista idiay Algiers.
Idi 1934, inkasarna ni Simone Hie, ngem apagbiit ti panagdennada ta nagsinada gapu iti pannakikamkamalala ni Simone ken iti pannakailuodna iti morfina. Idi 1940, nagkasar manen ni Camus ket inasawana ni Francine Faure. Nangrugi nga agsurat para ti maysa a magasin idiay Paris. Bayat ti Maikadua a Gubat Sangalubongan, immakar idiay Bordeaux ket ditoy ti nangleppasanna iti umuna nga obrana a Ti Ganggannaet ken Ti Mito ni Sisipus.
Nagayyemna ni Jean-Paul Sartre bayat ti gubat, idi nagtrabaho a mannurat ken editor iti pagiwarnak dagiti Guerrilla nga Franciano. Kalpasan ti gubat, nagbalin a kameng ti bunggoy ni Sartre a mangipangato iti existensialismo a Frances.
Idi 1949, nagsubli ti sakitna a sarut ket impaknina ti bagina iti dua a tawen. Idi 1951, impablaakna ti Ti Rebelde a nangiwaksi iti comunismo. Adu iti narurod itoy, agraman ni Sartre.
Ti kangrunaan a kontribusionna iti filosofia ket ti pamanunotanna nga absurdismo.
Pimmusay ni Camus idi Enero 4, 1960 iti pannakadesgrasiana iti kotse idiay Sens, kaduana iti gayyemna nga agiwarwarnak a ni Michel Gallimard.
[baliwan] Dagiti nalatak nga obrana
[baliwan] Novela
- Ti Ganggannaet (L'Étranger) (1942)
- Ti Angol (La Peste) (1947)
- Ti Pannakatinnag (La Chute) (1956)
- Maysa a Naragsak nga Ipapatay (La Mort heureuse) (nasapa a version ti Ti Ganggannaet, naipablaak idi 1970 kalpasan ti pannakatayna)
- Ti Umuna a Lalaki (Le premier homme) (saan a nalpas, naipablaak idi 1995)
[baliwan] Ababa a sarita
- Panagtalaw ken ti Pagarian (L'exil et le royaume) (1957)
[baliwan] Saan-a-fiksion
- Agsumbangir (L'envers et l'endroit) (collection, 1937)
- Dangadang (Combat) (1946)
- Ti Mito ni Sisipus (Le Mythe de Sisyphe) (1942)
- Ti Rebelde (L'Homme révolté) (1951)
- Kuadkuaderno 1935-1942 (Carnets, mai 1935 -- fevrier 1942) (1962)
- Kuadkuaderno 1943-1951 (1965)
[baliwan] Drama
- Caligula (impabuya 1945, insurat 1938)
- Ti Saan a Panagkinnaawatan (Le Malentendu) (1944)
- Ti Kasasaad ti Panaglawlaw (L'État de siège) (1948)
- Dagiti Nalintegan (Les Justes) (1949)
[baliwan] Koleksion
- Resistansia, Panagrebelde, ken ti Ipapatay (1961 - Napili a sarsarita)
