Martin Luther King, Jr.
De Wikipedia, le encyclopedia libere
Le reverende Martin Luther King, Jr. (15 de januario 1929 - 4 de april 1968) esseva un pastor baptista e un afro-americano militante pro le derectos civil. Ille organisava e dirigeva alicun marchas pro le derecto de votar, le dissegregation racial, le empleo de minoritates, e de altere derectos civil elementari. Le governamento american impartiva le major parte de iste derectos per le leges Civil Rights Act (Acto pro Derectos Civil) e Voting Rights Act (Acto pro Derectos de Votar). King es cognoscite super toto pro su discurso I have a dream (Io ha un sonio) [1], prononciate le 28 de augusto 1963 ante le Monumento Commemorative de Lincoln a Washington, DC durante le marcha pro le empleo e le libertate. Ille incontrava John F. Kennedy qui le dava un grande appoio pro le lucta contra le discrimination racial.
King recipeva su diploma de B.A. al Morehouse College in 1948 e su diploma de B.D. del seminario theologic Crozer in 1951. Ille recipeva un diploma de PhD del Universitate de Boston in 1955.
In 1954, Martin Luther King, Jr. deveniva le pastor del ecclesia baptista del avenue Dexter a Montgomery, in Alabama. Ille esseva le leader del boycott del buses in Montgomery in 1955 que comenciava quando Seniora Rosa Parks refusava de ceder su sede a un persona del racia blanc. Durante ille campania, on arrestava King. Le campania se terminava quando le Corte Supreme del Statos Unite declarava que le segregation in le autobuses es illegal.
Tote le protestos e marchas que King duceva esseva pacific e ille sequeva le theorias del disobedientia civil de Mohandas Gandhi de India. In 1964, Martin Luther King ganiava le Premio Nobel del Pace.
Un poco ante su morte ille habeva reinfortiate su lucta pro defender le Negros per un combatto pro defender le pauperes. Ille moriva le 4 de april 1968, a Memphis, Tennessee in Tennessee, assassinate al etate de 39 annos per James Earl Ray, un tirator imboscate. Ray recipeva le judicamento de imprisionamento perpetue pro le crimine. Durante le annos, varie personas ha proponite que Ray non esseva le ver assassino ma que il habeva un conspiration del FBI o del governamento. Isto ha nunquam essite probate.
[modificar] Ligamine externe
