Մկրտիչ Արմեն

Վիքիփեդիայից՝ ազատ հանրագիտարանից

Մկրտիչ Արմեն (Մկրտիչ Գրիգորի Հարությունյան) (Դեկտեմբերի 27, 1906 - Դեկտեմբերի 22, 1972) ― բանաստեղծ, արձակագիր, թարգմանիչ։

Մկրտիչ Արմենը ծնվել է 1906 թ. դեկտեմբերի 27-ին Ալեքսանդրապոլում (այժմ՝ Գյումրի) արհեստավորի ընտանիքում։ Սկզբնական կրթությունը ստացել է տեղի վիճակագրական դպրոցում, այնուհետեւ ուսումը շարունակել տղայոց գիմնազիայում։ Ուսանել է նաեւ Մոսկվայի կինեմատոգրաֆիայի պետական ինստիտուտի սցենարական բաժնում։

1937 թ.-ին շատ հայ մտավորականների նման Մ.Արմենը՝ որպես ժողովրդի թշնամի, ձերբակալվում է եւ աքսորավայրում անցկացնում ութ ծանր ու ձիգ տարիներ։ 1945 թ. արդարացվում է եւ վերադառնում ստեղծագործական աշխատանքի։

Բավականին մեծ է գրողի թողած գրական ժառանգությունը։ Նա հեղինակ է մի շարք վեպերի, վիպակների, երկերի, պատմվածքների, պիեսների, բանաստեղծությունների։ Հեղինակին մեծ համբավ է բերել «Հեղնար աղբյուր» վիպակը։

Հարուստ եւ բազմաբնույթ է Մ. Արմենի ստեղծագործությունները։ Նրա ստեղծագործություններից են՝ «Երեւան» էպոպեան, «Ժիրայր Գլենց», «Աշխարհ» վեպերը, աքսորավայրում անցկացրած ծանր տարիներին նվիրված «Պատվիրեցին հանձնել Ձեզ» պատմվածքների ժողովածուն։ Մ. Արմենը ստեղծագործել է նաեւ չափածո ժանրում։ Գրել է նաև մանկապատանեկան բանաստեղծություններ եւ թարգմանություններ։ Մկրտիչ Արմենը մի շարք գրականագիտական աշխատությունների եւ հոդվածների հեղինակ է։