María Magdalena
Na Galipedia, a wikipedia en galego.
Persoaxe dos evanxelios sinópticos do Evanxelio de Xoán e de varios evanxelios apócrifos. Entre eles un que leva o seu nome.
Índice |
[editar] Discípula
As fontes afirman que Xesús de Nazareth expulsara dela sete demos (Mc 16,9). A cifra sete é sinónimo de plenitude o que é interpretado como unha enfermidade psicofísica aguda ou ben unha perversidade extrema. Unha ou outra, consonte a mentalidade de entón, consecuencia do pecado.
Tras a curación, foi unha das discípulas itinerantes que seguiron a Xesús por Galilea e Xudea, na súa predicación da boa noticia (evangelion) da chegada do Reino de Deus. Está en todas as relacións de mulleres seguidoras de Xesús. Isto ten chamado a atención dos exexetas e historiadores, que salientan a singularidade para a época dun grupo de mulleres que seguían a un rabí itinerante.
Aparece tamén no momento da crucifixión, ao pé da cruz, cando Xesús foi abandonado de todos.
Finalmente, chama a atención o seu papel destacado na descuberta do sepulcro baleiro e na primeira aparición de Xesús resucitado, dado o nulo valor do testimuño dunha muller na sociedade daquel tempo. De feito os discípulos tomárono inicialmente como un delirio (Lc 24, 11). Isto foi utilizado nos primeiros séculos do cristianismo polos detractores da fe na resurrección. O filósofo platónico Celso (século II) no seu discurso verdadeiro contra os cristiáns descalifica unha fe que se basea no testimuño dunha muller histérica.
Todos estes factores fan que os especialistas entendan que é unha das figuras da primeira tradición cristiá cuxa historicidade semella mellor acreditada (criterio de dificultade e criterio de testimuño múltiple).
[editar] Identificación
Non está nada claro que sexa a prostituta dos evanxelios sinópticos que unxe a Xesús ante o escándalo dos fariseos, aínda que o sentir popular así a identificou. Existe tamén unha identificación non probada coa muller adúltera do Evanxelio de Xoán á que Xesús salva de morrer lapidada polos seus acusadores. Non falta quen defenda a plausibilidade destas teses debido á procedencia: Magdala, un lugar próximo ao lago de Xenesaret (Tiberíades) que era unha localidade fabril, destino maioritariamente masculino e, xa que logo, posible foco de prostitución. Ser muller de Magdala non debía se boa carta de presentación. De feito, unha das acusacións máis frecuentes a Xesús é a súa cercanía aos pecadores públicos (Mt 9,11). Pero isto non deixa de ser unha mera hipótese.
[editar] Apócrifos
No evanxelio apócrifo que leva o seu nome aparece discutindo con Pedro. O cal semella ciumento das revelacións particulares das que era depositaria.
No Evanxelio de Felipe, de contido gnóstico e escrito en lingua copta, dise que Xesús amábaa máis que todos os discípulos e que a miudo a bicaba na boca. Algo que estimulou a fantasía nalgúns autores contemporáneos. Tamén neste evanxelio rivaliza con Pedro.
[editar] Consideración
As igrexas católica, ortodoxa, e as antigas igrexas orientais siriaca, copta, armenia e etíope tivérona sempre en gran consideración. A piedade popular e a tradición eclesiástica considéraa apóstol dos apóstoles (Apostolorum Apostola), por ser a primeira portadora da noticia central da fe cristiá: a resurrección de Xesús.
Na historia da arte aparece como icono da pecadora arrepentida.
