Luftwaffe
Na Galipedia, a wikipedia en galego.
Luftwaffe é unha voz alemá que significa arma aerea. Así se lle chama ao Exército Alemán do Aire, reconstituido baixo a direción de Hermann Göring a partires de 1935.
[editar] Historia
[editar] Orixes
O predecesor da Luftwaffe, o Servizo Aéreo Imperial Alemán (Luftstreitkräfte), fundouse en 1910 coa aparición dos avións militares, aínda que a intención inicial era usala en tarefas unicamente de recoñecemento como apoio aos exércitos en terra, como xa se fixera cos globos na Guerra Franco-Prusiana de 1870-1871 ou mesmo nas Guerras Napoleónicas.
Durante a Primeira Guerra Mundial, a Luftstreitkräfte utilizou unha ampla variedade de avións, como cazas (como os fabricados por Albatros-Flugzeugwerke e Fokker), aeronaves de recoñecemento (Aviatik e DFW) e bombardeiros pesados (Gothaer Waggonfabrik e Zeppelin-Staaken).
Os cazas son os que captaron unha maior atención, sobre todo grazas á aparición dos "ases", como o famoso Manfred von Richthofen, coñecido popularmente como "O Barón Roxo" ("der rote Baron"), Ernst Udet, Hermann Göring, Oswald Boelcke )considerado o primeiro gran táctico da caza aérea), Max Immelmann (o primeiro aviador en gañar a Pour le Mérite, a condecoración ao valor máis importante do Imperio Alemán) e Werner Voss.
Todos os avións militares alemán e autro-húngaros en servizo usaron a insignia da Cruz de Ferro ata principios de 1918. Despois diso, introdúxose a Balkenkreuz (Cruz dos Balcáns).
Despois da derrota de Alemaña na guerra, o servizo aéreo disolveuse completamente baixo as condicións do Tratado de Versalles, que demandaba que os seus aeroplanos fosen destruídos.
[editar] Período de entreguerras
Dende que lle foi prohibida a Alemaña a posesión dunha forza aérea, existiu a necesidade de adestrar en segredo aos seus pilotos para unha futura guerra. Inicialmente, foron usadas as escolas de aviación civil dentro de Alemaña, e aínda que só podían prestar un adestramento con avións lixeiros foron usadas para que cara o exterior semallase que os adestramentos estaban destinados á aviación civil.
Coa intención de adestrar aos seus pilotos nos últimos modelos de avións de combate, Alemaña solicitou a axuda do seu futuro inimigo, a Unión Soviética, a cal tamén estaba illada en Europa. Estableceuse un aeroporto de adestramento segredo en Lipetsk no ano 1924, e funcionou durante uns nove anos usando sobre todo avións de adestramento rusos e holandeses, aínda que tamén algún alemán, antes de ser pechado en 1933. Esta base era oficialmente coñecida como 4º escadrón da 40ª á do Exército Roxo.
O 26 de febreiro de 1935, Adolf Hitler ordenou a Hermann Göring reinstaurar a Luftwaffe, rompendo o Tratado de Versalles asinado en 1919.
