Francisco Fernández Rei
Na Galipedia, a wikipedia en galego.
Francisco Fernández Rei ( nado en 1952 en Cambados) é un filólogo galego.
Relizou a carreira de Filoloxía Románica na Universidade de Santiago de Compostela onde obtivo a licenciatura en 1974. Actualmente exerce na actualidade a docencia nesta universidade e é catedrático de Filoloxía Románica desde 1992.
Desde 1973 forma parte do Instituto da Lingua Galega (ILG), como investigador e membro do equipo de redacción do Atlas Lingüítico Galego e como responsábel do Arquivo do Galego Oral que posúe este centro. Dentro dos eidos de actuación do ILG traballou, así mesmo, como corredactor das Bases prá unificación das normas lingüísticas do galego en 1977, que constituirían os alicerces das que se aprobaron en 1988.
A parte da súa actividade no ILG, Francisco Fernández Rei colabora tamén con numerosas asociacións e entidades relacionadas con diferentes linguas románicas, especialmente o galego. En 1978 participou na fundación de Escola Aberta e en 1984 contribuíu á creación da Asociación de Tradutores Galegos. É membro, así mesmo, do comité científico da Sociedade Internacional de Limba Sarda, do plenario do Consello da Cultura Galega en representación do ILG, do Padroado da Fundación Sotelo Blanco, do Museo de Antropoloxía, do Museo do Pobo Galego e da comisión da Mesa prá Defensa del Galego de Asturias.
Tamén hai que destacar a súa participación en distintos encontros e congresos sobre o galego e outras linguas románicas minorizadas e ten publicado artigos en diferentes revistas culturais galegas, como A Trabe de Ouro, Revista da Filoloxía Románica, Cadernos da Lingua, Grial...
Fernández Rei é conselleiro do Consello d'a Fabla Aragonesa e membro numerario da Real Academia Galega.
[editar] Obra
- Lingua galega (1985), manual para COU.
- Dialectoloxía da lingua galega (1990), Premio Antón Losada Diéguez de investigación.
- Homenaxe ó profesor Constantino García (1991), coa profesora Mercedes Brea e realizado polo departamento de Filoloxía Galega da universidade compostelá.
- A nosa fala: bloques e áreas lingüísticas do galego (1996), audio-libro publicado xunto a Carme Hermida.
- Estudios de sociolingüística románica: linguas e variedades minorizadas (1999), publicado xunto a Antón Santamarina Fernández.
