Jouswier

Ut Wikipedy

De himrik fan Jouswier.

Jouswier is in lyts doarp yn de gemeente Dongeradiel, dat wat fansiden de wei fan Ie nei Mitselwier leit. It hat nea in grut doarp west. It hie eartiids mar 6 stimmen. No binne der 52 ynwenners.

Oant de gemeentlike weryndieling yn 1984 makke Jouswier diel út fan de gemeente East-Dongeradiel.

Alear wienen in pear states yn it doarp, mar dy wienen yn 1800 al ôfbrutsen.

[bewurkje seksje] De tsjerke

It pronkstik fan Jouswier is de tsjerke. De tsjerke wie wijd oan Petrus. De bou fan de tsjinwurdige tsjerke wie yn 1557. Yn 'e rin fan 'e tiid is er faak ferboud. Yn 1987 hat der in restauraasje plak fûn. De tsjerke stiet der no wer yn syn âlde gloarje.

De tsjerke is oerdroegen oan de stichting 'Alde Fryske Tsjerken'.

Yn de tsjerke is gjin elektryske ferljochting. Op de banken steane bleakers en der hingje kearsekroanen.

Opfallend binne de trije roubuorden foar de Bergsma's. De Bergsma's hawwe as wapen trije bargen. Dêrtroch wurdt de tsjerke ek wol de "Bargetsjerke" neamd.

[bewurkje seksje] De toer

De toer is klear kommen yn 1752. Hy hat in sealdaktoer en der hinget in klok út 1395 yn. Dizze is getten troch Hermanus.

[bewurkje seksje] De Bergsma's

De Bergsma's stamme ôf fan Pyter Arriens (1668- om 1735 hinne). Bergsma urf fan syn beppe de state Berghwegen yn Ingwierrum en it wapen mei de trije bargen.

Pyter waard sa in man fan stân, mei in protte lân. Hy waard notaris yn Dokkum. Syn neiteam brocht it fier. Willem Bergsma hat it ta grytman fan Eastdongeradiel brocht.

[bewurkje seksje] De Jouswierster polder

Ieuwenlang lei súdeast fan it doarp in lyts mar. Dat lei oan in natuelik wetter, de Mûzeryd, dat fan súdwest nei noardeast troch de marlannen rint en op'e Suderie útkomt. It part dêrfan, noard fan de wei Mitselwier-Ie, is in soarte fan opfeart. It marke is yn 1855 droechmeald. Sûnt lost in mûne it wetter troch in nije tochtsleat, westlik, op'e Suderie. De wynmûne is yn 1926 ferfongen troch in elektrysk gemaal.

De bekende Fryske dichter A.M. Wybenga (1881 - 1948), ferwurde it doarp en syn omkriten mei it fers:

Jouswier,

Dou bist mar in pjut fan in doarpke,
Hwat sobers oan d’ ein fan in wei,

Seis huzen en in âld tsjerkje,
En dêr is nou alles mei sei.

Dou hast mar in himpen fatsoentsje:
Hja groeven dyn terp amper wei;

Nou steane op it oerbleaune klobke
Dyn huzen elkoarren sa nei.

Mar dochs, as yn leaflike jounen
De dauwe oer dyn Marlannen tynt,

Dan likest in eilân yn ‘t sulver,
Dat wyt om dyn wenten him wynt.

Do leist dêr yn ‘t mids fan dyn greiden
Sa fredich, sa stil en sa blier;

Wol bistou de lytse fan trettjen,
Mar dochs sa’n romantysk Jouswier.