Eastrum
Ut Wikipedy
Eastrum leit as doarp mei 199 ynwenners tsjin Dokkum oan. It wie earder mei 18 stimmen de sechste yn rang yn de eardere gemeente East-Dongeradiel. De namme wurdt wol ferklearre as 'hiem oan de Ie'. Bedoeld wurdt dan de Suderie. Eastrum hie twa doarpsfearten. De iene gie nei de Suder Ie en de oare nei it Dokkumer Djip. Yn de lêste siet in slûs. It wie dan wol by ferdrach krekt fêstlein wa't wat foar it ûnderhâld betelje moast mar, sa't it faker gie, as it op beteljen oankaam, wie men net thús. De slûs is dan letter ferfallen en de skippen út Eastrum moasten troch de Suder Ie.
Eastrum moat om it begjin fan ús jiertelling hinne ûntstien wêze.
De terp fan Eastrum is sa'n 4 1/2 meter heech. Om 1900 hinne is er foar in part ôfgroeven. Yn de terp binne yn 2006 by bouwurk fynsten dien út de tiid fan de Hunebêdbouwers, likernôch 3000 foar Kristus.
Ynhâld |
[bewurkje seksje] De Tsjerke
De begjin 15de ieuske tsjerke is tsjin in 13de ieuske toer oanboud. By de bou is materiaal fan in eardere tsjerke brûkt. De tsjerke wie wijd oan St. Nikolaas. Yn 1973 hat der in restauraasje plakfûn troch ir. P. Offringa út Grins.
De preekstoel út 1762 is makke troch Tjseard Durks. De panielen binne snijd troch D.Emdenveld út Ljouwert.
Nijsgjirrich binne de muorreskilderings út de 16de ieu. Se binne op de pleisterlaach mei brúnreade ferve oanbrocht. Ofbyld binne in fjouwertal tsjerken. It dúdlikste is dy fan de Dokkumer adbij mei de tsjintwurdige St.Martenstsjerke.
Oer de oaren is men net hielendal wis. It kinne de tsjerken fan Kollum, Hantum of Wetsens wêze.
De tsjerke is yn eigendom oergien nei de Stifting Alde Fryske Tsjerken.
[bewurkje seksje] De stinzen
Eastrum hie alear in stik of trije stinzen: Mellema, Rinthjema en Sjûkma.
[bewurkje seksje] It stienfabryk
Oan it Grutdjip hat Jan Helder yn 1873 in stienfabryk stifte. De saken gienen goed en der moast útwreide wurde. De skoarstienpiip waard yn 1879 ferhege ta 35 meter. It is in punt dat opfalt yn it lânskip.
Der waard meastentiids reade parsstien makke. Winters waard de giele stien yn lytse foarm makke, fan klaai wûn ûnder Hitzum.
Yn 1968 waard it fabryk sletten. Oerbleaun is in yndustrieel monumint. De piip, de parse-ûnen en de grutte droechskuorren steane der noch as in oantinken oan it ferline.
[bewurkje seksje] Ferskaat
- De Fryske skriuwer Nyckle Haisma ( Eastrum 18 maaie 1907 - 22 febrewaris 1943 is in bekende Eastrumer.
- Heeringa-Seepma, H. - By ús yn Eastrum foar elke nije ynwenner fan Eastrum.
- Wendela Bonga, S.E. - Oer Eastrum ald en nij 1942
[bewurkje seksje] Strjitten:
Grienewei, Heechswei, Mellemawei, Skoallestrjitte, Terpleane, Tichelwei, Tsjerkepaad.
