Toru d'Osborne

Dendi Güiquipeya

Toru d´Osborni cercanu a Llanes (Asturias)

El toru d´Osborne es una gran silueta dun toru bravu, orihinalmenti pensá cumu una gran valla publicitaria e carretera (asiahás en diversus puntus de la heugrafia española. La su hunción era promocional el brandy Veterano el "Grupo Osborne", inque uguañoti s´an convertiu, amas de ena marca comercial de esta empresa, nun distintivu curtural español.

Torus similaris, tamién asiahaus pol el "Grupo Osborne", peru normalmenti con el nombri el brandy Magno impresu sobri ellus, desistin tamién enas carreteras mehicanas.

[eital] Cronulohia

1956: la ahencia publicitaria Azor realiza, pol encargu el "Grupo Osborne", el diseñu dun símbolu que sirviera pa represental el brandy Veterano en vallas publicitarias de carretera. El artista Manolo Prieto, colabutaol desta ahencia publicitaria, proponi la figura el toru bravu que entovía se conserva.
1958: en noviembri esmienzan a asiahalsi las primeras vallas, fabricás en maera. Miían 4 metrus d´artura, tinian los cuernus pintaus de brancu i un rótulu que anunciaba la bebia.
1961: puestu que las condicionis meteorolóhicas contrarias dañaban las vallas de maera, prencipian a costruilsi chapás en metal. Se aumenta el su grandol hata los 7 metrus.
1962: tras un chambu ena normativa e los cartelis publicitarius de carretera, s´istalan vallas de cerca e 14 metrus d´artura.
1988: en huliu la "Ley General de Carreteras" (Lei Heneral de Carreteras) obliga a retiral la publiciá e cualquiá lugal visibli e cualquiá carretera estatal. Desaici la rotulación de las vallas, inque éstas se conservan.
1994: en setiembri se pubrica el Reglamento General de Carreteras (Reglamentu Heneral de Carreteras) que ordena quital tolos torus d´Osborne. Varias comuniáis autónumas, una tupa municipius, asociacionis curturalis, artistas, políticus i perioistas se prenuncian a favol el mantenimientu e las vallas. La Hunta d´Andalucía píi la su catalogación cumu "bien curtural" i la Comuniá Foral de Navarra se ampara nuna Lei Foral pa mantenel el toru el su territoriu.
1997: en diciembri el Tribunal Supremu dita sentencia a favol el mantenimientu e los torus d´Osborne ebiu al "enterés estéticu u curtural" que se les á dau.
De 1998 en adelanti: el Toru d´Osborne eha e sel un símbolu estritamenti comercial. Inque nu es oficialmenti un símbolu d´ientiá d´España, los nacionalistas catalanis tratan pol tolos meyus d´eschangal el únicu toru asiahau en Cataluña^[1], en El Bruc, hata que se desisti e ponelu nuevamenti en pie. De la mesma horma, angunus nacionalistas de Cataluña an adotau cumu símbolu propiu al burru u "ruc" catalán.
2007: en agostu es derribau el úrtimu Toru d´Osborne desistenti ena Comuniá Autónuma e Cataluña pol un grupu endependentista autuhucheau "Hermandad catalana La Bandera Negra". Tan sólu una semana enantis abia siu reasiahau aluspués de 9 añus d´ausencia.

[eital] Asiahamientus

Uguañoti desistin 88 torus d´Osborne asiahaus de horma irregulal pol España: mentris que angunas autonumias carecin d´ellus (Cantabria, Ceuta, Melilla i Murcia), u sólu tiinin unu (Cataluña, Islas Balearis, Islas Canarias, Navarra i Pais Vascu), la província e Cádis chega a tenel ochu. A continuación se muestra una tabra cola distribución pol comuniáis:

Rehión	Cantiá
Andalucia	22
Aragón	6
Asturias	5
Balearis	1
Canarias	1
Cantabria	0
Castilla-La Mancha	13
Castilla i Lión	13
Cataluña	1
Estremaura	5
Galicia	5
Madrí	2
Rehión de Murcia	0
Navarra	1
La Rioha	2
Comuniá Valenciana	11
Pais Vascu	1

[eital] La "vaca d´Osborne"

Entri los dias 8 i 11 e mayu e 2005 Javier Figueredo, un hovin artista cazriñu, huntu con otras tres presonas nu ientificás, trashormun el cartel publicitariu el Toru d´Osborne asiahau a la artura el quilómetru 535 de la N-630, cerca e Casal de Cazris, n´una vaca suiza. Pintun unas manchas brancas chambandu el su traicional colol negru i le pusierun unas ubris de chapa e colol rosa.

Javier Figueredo izi que "La vaca d´Osborne" hue una reivindicación artística. Queria reivindical un mayol enterés curtural en Estremaura, potencial la candidatura e Cazris cumu Capital Curtural Uropea e 2016 i critical los pobremas socialis cumu la violencia e héneru u la discriminación sesual.

Figueredo hue denunciau pola Guardia Cevil de Casal de Cazris el 20 e mayu e 2005 cumu presuntu autol de la pintá. En prencipiu piían seis dias de servicius a la comuniá pola trashormación el toru. Finalmenti tó queó en dos dias d´arrestu domiciliariu.

Una condena e dos dias d´arrestu es la pena que el hués titulal el Husgau númeru 5 e Cazris impusu a Javier Figueredo. El jués le consieró culpabli duna farta e deslucimientu e bienis inmueblis.