Güiquipeya
Dendi Güiquipeya
Güiquipeya es una enciclupeya libri en estremeñu sostribá ena tenulohia güiqui (wiki). Güiquipeya s'escrebi de mó i maea colabutativa pol mé voluntárius, premitiendu que los endirguis seyan moificaus pol cualisquiel presona con acesu através dun escrucaol web. El proyeutu tuvu nacéncia el 24 d'Eneru e 2007, hundá pol Ánhel Ronceru, inque nu sedria hata el 26 de Mayu de 2008 cuandu el proyeutu sedria muau al su própiu domiñu. Nesta web se trata e dal a conocel Estremaura pol mé las sus luengas, tomandu cumu basi la Güiquipeya en artuestremeñu.
Continius |
[eital] Caraterísticas
El lema la Güiquipeya es «Si tiinis conocéncia la tu curtura, lo pol qué nu la tiinis de la tu palra?», i puemus descrebila cumu «un hirón pa distribuil la conocéncia la rialiá estremeña ena su própia palra, ena que tolos estremeñus puean colabutal, tantu ena su espansión, cumu nel crecimientu del parabreru estremeñu pa consiguil concencialmus de qu'abemus derechu de palral en estremeñu».
Desistin tres caraterísticas esencialis del proyeutu Güiquipeya que definin la su hunción ena Web:
- Es una enciclupeya, entendia cumu soporti que premiti arrehuntal i tresmitil la enhormación de horma estruturá.
- Es un güiqui, polo que, con poquinas ececionis, puei sel eitá pol cualisquiá.
- Es de continiu abiertu i gasta la licéncia GFDL.
Güiquipeya tiini un hazi pulíticas qu'estruca qué enhormación s'ebi encruil u nu. Estas pulíticas se gastan pa resorvel pobremas al tentu añiil, revisal, mual u esborral endirguis.
[eital] Eición
En Güiquipeya cualisquiel presona puei crial un endirgui nuevu en estremeñu i abati cualisquiel vesitanti puei eital el conteniu, ecetu los endirguis que s'alcuentrin protehius. Esti proyeutu hue criau cola idea e qu'el colabutaeru entri usuárius pola mehora dun endirgui duranti un tiempu proucirá testus de caliá, a semilitú los proyeutus d'esarrollu d'apricacionis libris. Los endirguis volucionan a través del tiempu i estu es visibri nel su estorial d'eicionis. A vezis, se dan chascus en que presonas entran ena Güiqui con el fin de molestal, prouciéndusi vandalismus i guerras d'eicionis, si alcuentras angún artículu en mal estau, comunicalu a angún çahoril.
[eital] Pulíticas
- Ebiu a la divelsiá i númiru e participantis e ideoluhias, Güiquipeya trata e costruil los sus endirguis de la holma mas esaustiva posibri. El ohetivu nu es escrebil endirguis dendi un puntu e vista, sinu presental abiertamenti ca postura al tentu un tema concretu.
- Se gastan un númiru e convencionis tocanti al nombri los endirguis, otandu preferentienti pola velsión más gastá comunmenti.
- Las carabas al tentu el conteniu i eición dun endirgui se dará enas páhinas de caraba los endirguis, i nu enos própius endirguis.
- Desistin un númiru de temas que son hundeaus huera la Güiquipeya pol nu sel endirguis encliclupéyicus estritamenti palrandu. Pol sabulugal, Güiquipeya nu contieni definicionis d'icionárius (cumu verbus, ahetivus...).
[eital] Neutraliá e contenius
Es común qu'angunas presonas se vaigan enfurruscás pol ideoluhias políticas u puntus de vista deferentis u que chocan contra la sus opinionis. Velaí la razón pola que Güiquipeya creci, grácias a los hironis pol enhieltal una neutraliá ena conocéncia.
Ya qu'es emposibri que la conocéncia seya asoluta i neutral, nangunus endirguis ebi ehalsi el ergullu presonal pa huera pa dal pasu al proyeutu Güiquipeya premitiendu la libertá d'opinión.
Es emportanti sabel i conocel que naidi es dueñu e dengún endirgui espuestu ena Güiquipeya.
[eital] Presonal
Los colabutaoris la Güiquipeya atuan decontinu e horma voluntária. Ai varias hormas de colabutal amas de crial u amplial endirguis, se puein aprical las convencionis d'estilu establecias p'aquellus endirguis que nu las tienin, asiahalus pol matéria, correhil fartas d'ortugrafia, hundeal testus con copyright...
Pa colabutal nu es mestel rustrilsi, inque a los usuárius que nu lo hazin se les atarugan ciertas acionis, cumu votal ena toma e decisionis. Angunus colabutaoris tienin la capaciá d'aconchegal angunas operacionis estra, comu el esborrau d'endirguis, el tarugu e páhinas, i tal i más. Sin embargu, estus usuárius nu tienin capaciá e decisión mayol que la de cualisquiel algotra presona, i las sus acionis s'ebin ahustal a las políticas adotás pol tola comuniá.