Jose Manuel Aizpurua
Wikipedia(e)tik
Jose Manuel Aizpurua Azketa (1902-1936) arkitekto eta argazkilari donostiarra zen, ezaguna Donostiako Klub Nautikoa eraikin arrazionalista proiektatu eta garaiko arkitektura eta arte ideia berritzaileak zabaldu zituelako.
Donostian jaio eta Madrilen egin zituen ikasketak 1921-1927 artean eta bertan ezagutu zituen Federico Garcia Lorca, Luis Buñuel eta Salvador Dali.
Joakin Labaienekin batera 1929an Donostiako Klub Nautikoa eraiki zuten, Europako eraikin arrazionalista goiztiar eta garrantzitsuenetakotzat jotzen dena. Orduko Kasino Handiaren ondoan kokatua (oraingo Udaletxea), haren itxura garbiak, zuritasunak eta itsas munduko formak erabiliz, berehala lotzen dute garaiko makinismo eta Le Corbusier arkitektoaren pentsamolde abangoardistekin.
Ideia berritzaile hauek zabaldu nahian, 1930 urtean erakusketa bat antolatu zuen Mercadal, Txurruka, Labaien eta bere lanekin Gipuzkoako Ateneoan. Talde hau GATEPAC (Grupo de Artistas y Tecnicos Españoles para el Progreso de la Arquitectura Contemporanea) delakoan integratu ziren 1930eko amaieran, Iparraldeko Taldea izena hartuz. GATEPAC taldeak Espainiako Arkitekturaren garapena zuen helburu, Kataluniako GATCPAC (Grup d'Arquitectes i Tècnics Catalans per el Progrés de l'Arquitectura Contemporània) delakoaren urratsei jarraiki.
1930ko hamarkadan ideia faxistekin bat egin zuen eta Espainiako Falangearen sortzaileetariko bat izan zen. Espainiako Gerra Zibilean Donostian bertan fusilatu zuten arrazoi horregatik.
