Dragoi Bola (animea)

Wikipedia(e)tik

Dragoi Bola

Jatorrizko izena	ドラゴンボール (Doragon Bōru) Dragon Ball
Egilea	Akira Toriyama
Generoa	Abentura, Akzioa, Arte martzialak, Drama, Fantasia, Komedia, Shōnen
Zuzendaria	Daisuke Nishio
Estudioak	Bird Studio, Toei Animation
Telebista katea	Fuji Tv ETB1
Noiz hasi zen	1986ko otsailaren 26an
Noiz bukatu	1989ko apirilaren 19an
Atal kopurua	153
Filmak	4

Hemengo testu batzuk japonieraz daude.
Euskarri eleaniztun egokirik gabe, galdera
ikurrak ikusiko dituzu kanji edo kana ordez.

Dragoi Bola (jatorrizko japonieraz ドラゴンボール edo Doragon Bōru, ingelesez Dragon Ball) Akira Toriyamak idatzi eta marrazturiko manga (komiki japoniarra) da. 1984tik 1995era Weekly Shonen Jump aldizkarian argitaratua izan zen.

Dragoi Bola animea telebistarako mangaren moldaketa da. Guztira 508 atalez osatuta dago, hiru zati nagusitan banatuta Dragoi Bola, Dragoi Bola Z eta Dragoi Bola GT. Hau hiru zatietatik lehena da eta 153 atal ditu eta mangaren lehen 194 kapituluak egokitzen ditu. Lehen atala 1986ko otsailaren 26an emititu zen Japonian Fuji Tv telebista katean. Atal hauetaz aparte beste 4 film ditu. Esan beharra dago ere, animean jatorrizko mangan ez dauden istorioak agertzen direla edo mangaren istorioa apur bat aldatzen dela.

Eduki-taula

1 Argumentua
2 Atalen banaketa
3 Filmak
4 Musika
5 Dragoi Bola animea Euskal Herrian
- 5.1 Hasierako abestia euskaraz
- 5.2 Bukaerako abestia euskaraz
6 Zentsura
7 Ikus, gainera
8 Kanpo loturak

[aldatu] Argumentua

Oharra: Atal honek istorio osoa edo amaiera argitzen du.

Dragoi Bolak Son Goku izeneko tximino isatsa duen mutil baten abenturak kontatzen ditu, bere haurtzarotik heldu bihurtzen den arte. Arte martzialen munduan girotuta dago eta 7 Dragoi Bolen bilaketan oinarritzen da. Kondairak dioenez, Shenron dragoiak 7 Dragoi Bolak biltzen dituenaren edozein gurari betearaziko du.

[aldatu] Dragoi Bolen lehen bilaketa

Istorioa Son Goku eta Bulma elkar ezagutzen direnean hasten da. Izan ere Son Goku bere aitonak emandako 4 izarreko Dragoi Bolaren jabe da, eta Bulma 7 bolen bila dabil. Dragoi Bolak biltzeko Bulmak berak (16 urte dituen neska gazte adimentsua) asmatutako Dragoi Radarra erabiltzen dute. Baina Pilaf erregea ere Dragoi Bolen bila ari da, eta bere trikimailuak erabiliz Gokuk eta bere lagunek dituzten bolak lapurtuko ditu. Pilafek Shenron dragoia deitzea lortzen du ilargi beteko gau batean, Son Goku gorila erraldoi bihurtzen delarik. Azkenean Oolongek bere nahia beteko du eta Goku bere onera itzuliko da Yamcha eta Puarri esker.

[aldatu] Arte Martzialen 21. Mundu Txapelketa

Abentura honen ostean Son Goku Iratxo Dortokarekin entrenatzera doa. Bertan Krilin eta Lunch ezagutuko ditu. Entrenamendu hilabete batzuren ondoren Gokuk eta Krilinek Arte Martzialen 21. Mundu Txapelketan parte hartzen dute. Gokuk finalean galtzen du Jackie Chunen aurka (Iratxo Dortoka mozorrotuta).

[aldatu] Zapi Gorridun Armadaren saga

Txapelketa ostean Son Goku munduan zehar ostendu zen aitonaren Dragoi Bolaren bila hasten da. Zoritxarrez, oraingoan ere ez da bolen bila dabilen bakarra, izan ere Zapi Gorridun Armada hauen bila dabil. Silver Koronela, White eta Blue Jeneralak garaitu ostean, Goku Tao Pai Pairen aurka borrokatuko da. Lehen borrokaldian Tao Pai Paik irabazten du, bigarrenean aldiz, Goku da garaile Karin maisuarekin 3 egunez aritu ondoren. Borrokaldi hauetan Tao Pai Paik Uparen aita, Bora (Lur Santuko zaindaria), hitzen du. Honen ondorioz Son Gokuk Zapi Gorridun Armada desegitea erabakitzen du eta bera bakarrik kuartel nagusirantz abiatzen da. Oztopo guztiak saihestu ostean armada osoa garaitzea lortzen du, 6 Dragoi Bola bilduz.

[aldatu] Babaren saga

Gokuren helburua 7 bolak biltzea eta Bora berpiztea da, baina falta den 7. Dragoi Bola ez da Dragoi Radarrean agertzen. Horregatik Goku bere lagunekin elkartzen da Baba igarlearengana joateko, bera baita azken bola aurki dezakeen bakarra. Hala ere Babaren zerbitzuak lortzeko diru asko behar da, edo bestela bere zerbitzura dauden 5 borrokalariak garaitu behar dira. Goku eta lagunek bigarren aukera hartu beharrean aurkitzen dira eta asko kostata helburua lortzen dute. Son Gokuk azken arerioa garaitzea lortzen du, hau bere aitona Son Gohan delarik. Honen ondoren Babak azken Dragoi Bola non dagoen esaten die, Pilafen eskuetan dagoelarik. Azkenean Son Gokuk 7 bolak eskuratzen ditu eta Shenronek Uparen aita berpizten du. Honen ondoren Son Goku eta lagunak hurrengo Arte Martzialen Txapelketareko entrenatzen hasiko dira.

[aldatu] Arte Martzialen 22. Mundu Txapelketa

Denbora pasa ostean Arte Martzialen 22. Mundu Txapelketa hasten da, eta lagun guztiak berriz elkartzen dira. Oraingoan Mikerroi, Iratxo Dortokaren betiko etsaia, agertzen da, bere bi ikasleak Ten Shin Han eta Chaoz txapelketan parte hartzen dutelarik. Finala Son Gokuk eta Ten Shin Hanek jokatzen dute, bigarrenak oso gutxigatik irabazten duelarik. Hemendik aurrera arerioak (Mikerroiren ikasleak) izan zirenak lagun bihurtzen dira.

[aldatu] Satan Bihotz Txikiren saga

Finala jokatzen den egunean bertan, eguzkia ezkutatu baino lehenago Gokuk Krilinen gorpua aurkitzen du, eta hiltzailearen atzetik abiatzen da. Hiltzaileak Satan Bihotz Txiki deabruen erregearen ikurra utzi zuen, urte asko lehenago Mutaitok (Iratxo Dortoka eta Mikerroiren irakaslea) eltze batean espetxeratutako munstroa. Satan Txiki 7 Dragoi Bolak bildu nahi ditu betiko gaztetasuna lortzeko, baita lortu ere eta gainera Shenron dragoia hiltzen du. Hau eragotzi nahian Chaozek eta Iratxo Dortokak bizia galtzen dute eta Son Goku larriki zauritua gelditzen da. Horrela Goku Lur Santura jotzen du berriz Yagi lagun berriaren laguntzarekin Karinen dorrea igotzeko. Indar gehiago lortzeko eta lagunak mendekatzeko asmoz Gokuk Ur Santua edaten du. Behin froga hau gaindituz, Goku Santa Bihotz Txikiren bila joaten da. Borroka latz baten ondoren Goku garaile irtetzen da, baina etsaiak, zituen azken indarrekin, barruan bere semea daraman arrautza bat erruten du.

[aldatu] Arte Martzialen 23. Mundu Txapelketa

Azken borroka honen ondoren Goku Karinengana itzultzen da, eta honek Ahalguztidunarengana bidaltzen du, bera baita Dragoi Bolen sortzailea. Poporen (Ahalguztidunaren zerbitzaria) froga batzuk gainditu ondoren, Ahalguztidunak Shenron berpizten du eta azken honek Krilin, Iratxo Dortoka eta Chaoz. Ordainetan Goku Popo eta Ahalguztidunarekin entrenatzen gelditzen da Arte Martzialen 23. Mundu Txapelketa hasi arte. Txapelketa honetan partaide oso indartsuak aurkezten dira: Chichi (partaide ezezagun bezala aurkezten da), ustez hilda zegoen Tao Pai Pai (Mikerroiren anaia txikia), Shen (Ahalguztiduna) eta Gazte (Satan Bihotz Txikiren semea). Finala Gaztek eta Son Gokuk jokatzen dute, Son Goku izanik garailea (bere bizitzan lehen aldiz txapelketan).

Anime hau, Son Goku eta Chichiren arteko ezkontzarekin bukatzen da.

[aldatu] Atalen banaketa

Animeak sagatan banatu ohi dira, hauek dira Dragoi Bolak dituenak:

Saga	Animeko atalak
Dragoi Bolen lehen bilaketa	1etik 13ra
Arte Martzialen 21. Mundu Txapelketa	14tik 28ra
Zapi Gorridun Armadaren saga	29tik 67ra
Babaren saga	68tik 83ra
Arte Martzialen 22. Mundu Txapelketa	84tik 101ra
Satan Bihotz Txikiren saga	102tik 122ra
Arte Martzialen 23. Mundu Txapelketa	123tik 153ra

[aldatu] Filmak

Dragoi Bolak 4 film ditu, film hauek animeko atal multzo baten laburpen antzekoak dira, hala ere pertsonaia berriak agertzen dira.

Dragoiaren kondaira (1986ko abenduaren 6a) ¹
Loti Ederra deabruaren gazteluan (1987 uztailaren 18a) ¹
Abentura mistikoa (1988ko uztailaren 9a) ¹
Boteretsuenaren bidean (1996ko martxoaren 4a) ²

1) Izenburu hauek euskal bikoizketan emandakoak dira. 2) Film hau ez da euskaratua izan, izenburu hau titulu japoniarretik itzuli da.

Azken filma Dragoi Bola animearen 10. urtemuga ospatzeko egin zen, hau izanik euskaraz bikoiztuta ez dagoen film bakarra.

[aldatu] Musika

Hasierako abestia:
1. "Makafushigi Adobenchā!"; 摩訶不思議アドベンチャー！
  - Hitzak: Yuriko Mori
  - Musika: Takeshi Ike
  - Moldaketa: Kōhei Tanaka
  - Interpretatzailea: Hiroki Takahashi (ez nahastu Hiroki Takahashi japoniar bikoiztailearenkin)

Bukaerako abestia:
1. "Romatikku Ageru Yo"; ロマンティックあげるよ
  - Hitzak: Takemi Yoshida
  - Musika: Takeshi Ike
  - Moldaketa: Kōhei Tanaka
  - Interpretatzailea: Ushio Hashimoto

[aldatu] Dragoi Bola animea Euskal Herrian

Dragoi Bolako 153 atalak euskaraz bikoiztu ziren, baita dituen 4 filmetatik 3. Dragoi Bola ETB1 telebista katean hainbat aldiz emititu zen 1980ko hamarkada bukaeratik aurrera. Euskaraz falta den film bakarra dirudienez ez da bikoiztuko.

[aldatu] Hasierako abestia euskaraz

Goazen lagunok amets betean
Dragoiaren Bola bila batera.
Orain badakit nongo zuloan
dagoen altxorrik ederrena.
Gure mundu hau irla haundi bat da
eta hortxe ostenduta altxor eder bat.

Bihotzean badut nik amets on ederrik
eta ez da eguzkirik distiratsuagorik,
goazen bihotza betean aurki dezagun,,
goazen, goazen, goazen, goazen, goazen.

Tximistaren bidetik Dragoi Bola bila,
itsaso eta lurrez bihotz bete ametsez
eta altxorra geuretzat izango da.

Ekin lagun bideari,
Son Gokurekin ez da beldurrik,
zeru goian nahiz lurrean
hegan eginez laster altxorra dugu.

[aldatu] Bukaerako abestia euskaraz

Ametsak ez dauka
inongo mugarik,
eta nik alde egin nahi nuke hemendik.
Benetan gogorra
eta ausarta bazara,
inoiz ez geratu atzera begira.

Bestela hemen, zure bizitzan,
ez daukazu ezer.
Maitasuna emateko
eta hartzekoa da.
Baina galdu baduzu,
nekez lortuko duzu,
eta orduan ahaztu.

Bihotzez maite zaitut,
zuk ere maite nauzu.
Bizitza bat eginda politagoa da.
Bihotzez maite zaitut,
zuk ere maite nauzu.
Ez egin ba negarrik,
zorion hutsa da gure maitasun garra.

[aldatu] Zentsura

Animea TF1 telebista kate frantziarrak erosi zuen eta gero Europa osoan zehar banatu zuen. Telebista kate honek eszena ugari zentsuratu zituen, hauen izaera indarkeriazkoa edo erotikoa zela eta. Eszena hauek ezabatuak izan ziren, eta ETB1ek ere zentsuratutako bideo hau erabili zuen.

AEBetan zentsura urrunago joan zen. Izan ere, eszenak mozteaz gain, tratamendu digitalen bidez irudia aldatu zuten. Adibidez, odol gehiegi ikusten zenean odol hau ezabatu egiten zen, eta norbait biluzik agertzen bazen barruko arropa marrazten zioten gainetik. Gainera elkarrizketa ugari aldatuak izan ziren, gehienbat alkohola, drogak edo joera sexual ezegokietaz hitz egiten zenean.