Sierôm
Oddi ar Wicipedia
Sant ac awdur Cristnogol oedd Sant Sierôm, Groeg: Ευσέβιος Σωφρόνιος Ιερώνυμος, Lladin: Eusebius Sophronius Hieronymus (tua 347 – 30 Medi 420). Mae'n fwyaf adnabyddus fel cyfeithydd y Beibl o'r Groeg a Hebraeg i'r Lladin. Cyfeithiad Sierôm yw'r Fwlgat, sy'n parhau i gael ei ddefnyddio.
Ganed ef tua 347 yn Strido, ar y ffin rhwng Pannonia a Dalmatia. Aeth i Rufain gyda'i gyfaill Bonosus i astudio rhethreg ac athroniaeth. Wedi rhai blynyddoedd yma aeth ef a Bonosus ymlaen i Gâl. Tua 373 aeth ar daith trwy Thrace ac Asia Leiaf i ogledd Syria. Cymerwyd ef yn ddifrifol wael yn Antioch, a chafodd weledigaeth a'i perswadiodd i ymroi i grefydd.
Ordeiniwyd ef yn Antioch gan yr Esgob Paulinus tua 378 neu 379, ac aeth i Gaergystennin i astudio dan Gregory Nazianzen. Wedi dwy flynedd yma, dychwelodd i Rufain lle bu'n cynorthwyo'r Pab Damasus I. Dychwelodd i Antioch yn 385 ac aeth ymlaen i ymweld a Jerusalem, Bethlehem a Galilea, yna ymlaen i'r Aifft. O 388 ymlaen, treuliodd y gweddill o'i fywyd fel meudwy gerllaw Bethlehem.
