Farfalla ferulaghja
From Wikipedia
A Farfalla ferulaghja (o Sbarabattula firulaghja) (Papilio hospiton) hè un tipu di farfalla chì face parte di a famiglia di e Nymphalidae. Hè una farfalla maiò, incù una apertura alare massima di 8 o 10 centimi. Per via di quessa l'adulti si vedenu è si scontranu à spessu in a natura, da maghju à ghjugnu. L'ale di daretu di a farfalla ferulaghja hanu spezia di coda. Ci hè pocu dimurfisimu sessuale è u masciu è a femina sò guasi listessi. A farfalla ferulaghja bula lestru è ùn hè micca cusì faciule d'ussirvà la annantu à un fiore.
I brughi sò verdi, incù anelli neri pichjulati di giallu. U brugu si nutrisce di cinqui pianti:
- a ferula (Ferula comunis)
- a ruta corsa (Ruta corsica)
- a pastinaccia (Pastinaca latifolia)
- Peucedanum officinale paniculatum
- è Laserpitium halleri cynapiifolium.
Per u più, si trova annantu à a ferula, da u livellu di u mare, insin'à 1200 metri.
A farfalla ferulaghja s'assumiglia assai à a farfalla finuchjaghja. E dui farfalle si ponu cunfonde. Ma esistenu qualchì differenze. Ci hè una grande tacca rossa in a coda ind'è Papilio machaon. Invece, ind'è a farfalla ferulaghja, 'ssa tacca hè più chjuga è chjirchjata nera. È a coda di a farfalla ferulaghja hè più corta ca quella di a farfalla finuchjaghja.
Accade ch'ellu ci fusi un'ibridazione trà a farfalla ferulaghja è farfalla finuchjaghja. Ma l'esemplari chì nascenu di 'ssa ibridazione sò sterili.
Cuntenutu |
[edit] In Corsica
A farfalla ferulaghja hè cumuna in Corsica. Si scontra per u più ind'ellu ci hè a ferula. Hè una spezia endemica di a Corsica è di a Sardegna. Esiste dinù in Corsica a farfalla finuchjaghja. Parechji siti impurtanti per a farfalla ferulaghja in Corsica sò: l'Agriate, u Cuscione è l'Alcudine.
[edit] Prutizzione
A farfalla ferulaghja hè prutetta à parechji livelli:
- a cunvinzione internaziunali di Washington (CITES) chì interdisce u cummerciu di e spezie di fauna è di flora minacciate di sparizione.
- a cunvinzione di Berna
- a dirittiva Habitat
- in Francia, hè scrittu annantu à lista d'insetti prutetti di l'arristatu di u 3 aostu 1979