Santiago R. Pepito, Jr.

Gikan sa Wikipedia, ang gawasnong ensayklopedya

Si Santiago Roflo Pepito, Jr. (Hul 25, 1937-Dis 17, 2005), nailhan usab sa dagangalang Juperosan, usa ka magsusulat sa pinulongang Sinugboanong Binisaya. Siya lumad nga taga Sogod, Sugbo.

Siya nailhan isip Juperosan sa bantogan niyang Mga Sugilanon ni To Imbong dihang siya maoy mibanos pagsulat sa maong binasa kaayong lindog sa BISAYA Magasin. Siya maoy ika-10 nga naeditor (gikan sa tuig 1995 hangtod sa 2001) sa maong publikasyon diin nakaalagad siya niinig tulo ka dekada sa iyang kinabuhi.

[usba] Personal nga kasayoran

Minyo siya kang Flordeliza R. Ramilo ug nakabatog unom ka anak: upat ka babaye ug duha ka lalaki. Nakuha niya ang A.B. English degree sa University of Southern Philippines ug nagtrabaho isip Information Editor sa Department of Agrarian Reform sa wala pa moalagad sa Bisaya Magasin. Tigtampohan usab siya sa kanhing Silaw, Alimyon, Bag-ong Suga, ug sa lokal nga mga tabloid sa Sugbo.

[usba] Mga pasidungog

Nakadawat siya sa Pasidungog UMPIL (2003), Gob. Gwen Garcia Literary Award (2004) sa SunStar ug uban pang mga tigi sa sinulatay. Usa siya sa maisip nga maoy nagpahingkod sa arte sa komiks sa Sinugboanong Binisaya kanus-a usa sa iyang sinulat nga komiks nahimoan og pelikula.

Sa iyang reputasyon sa pagpanulat sa Binisayang Sinugboanon, makadaghan siya kuhaang maghuhukom sa tigi sa panugilanon sa Carlos Palanca Memorial Awards for Literature. Usa usab siya sa mialagad isip konsultant alang sa pinulongang Sinugboanon sa Diksiyonaryong Filipino sa Unibersidad sa Pilipinas, ug sa uban pang akademikanhong tahas.

Kakontemporaryo niya sila si Gumer M. Rafanan, Arturo Peñaserada, ug Marcelo A. Geocallo.