Orestes (mitologiezh)
Diwar Wikipedia, an holloueziadur digor
Orestes (Ὀρέστης / Oréstês e gregach) a oa mab Agamemnon ha Klitemnestra hervez mojennoù Hellaz kozh. Breur e oa eta da Ifigenia hag Elektra, hag ivez, hervez Sofokles, da Gristotemis.
[kemmañ] Mojenn
A-raok brezel Troia, hag eñ bugelig c'hoazh, e oa prometet da zimeziñ d'e geniterv Hermione. Pa zistroas e dad Agamemnon eus ar brezel e voe lazhet gant e wreg Klitemnestra hag he serc'heg Egistos. Sevel a reas aon d'e c'hoar Elektra e vije lazhet he breur yaouank ivez . E fiziout a reas neuze en o eontr Stofios, e Fokida Chom a reas Elektra e ti he mamm muntrerez atav o sevel klemmoù, pa n'he doa miret en he fenn nemet ar mennozh ma teufe Orestes evit veñjiñ o zad.
Pa teuas Orestes da veza~un den deuet ez eas da Delfos evit selaou ouzh diougan Apollon a roas ur urzh taer dezhañ : Kerzh da lazhañ an daou o deus lazhet, adpren ar marv dre ar marv, skuilh ar gwad p'eo bet skuilhet ar gwad. Orestes ha Pilados, e genderv hag e vignon a distroas da di e dud e-lec'h ma adkavas Elektra a degemeras anezhañ gant levenez. Sevel a reont un irienn evit lazhañ an daou vuntrerien. Orestes ha Pilados a yeas d'ar palez hag e kasas ar c'heloù ma oa marvet Orestes. Met Klitemnestra a ouezas e oa e vab deuet evit he lazhañ. Klask a reas kendrec'hiñ Orestes ne c'helle ket lazhañ e vamm p'en doa dija lazhet Egistos. P'en doa lazhet e vamm, e embannas Orestes a-daol-trumm e oa taget gant maouezed du, dezho blev graet gant sarpantoù, an Erinnied, maouezed ar veñjiñ e oant, hag e tec'has kuit d'ur vro pell ac'han.
Diwar ali Apollon ez eas da Delfos evit bezañ dilammet eus pec'hed ar mammlazh gant an doueez Atena. Ma lavare Apollon e oa eñ atebeg al lazhadeg e kendalc'has an Erinnied sevel o c'hlemmoù. Nac'hañ a reas Orestes ne oa ket atebeg, met pa lavaras e oa bet didamallet eus ar muntr, ec'h embannas Atena e oa an hini kentañ eus e familh o anavezout e oberoù fall ken e talc'has da gendrec'hiñ an Erinnied hag ar re-se a yeas da vezañ an Eumenided, da lavaret eo an Hegaraded. Orestes a chomas en harlu, met mallozh tiernelezh an Atreidi a yeas da get.