Kevredad (gwir gall)

Diwar Wikipedia, an holloueziadur digor

E Bro-C'hall, meizad ar c'hevredad a zo termenet gant mellad 1832 ar C'hod keodedel :

« Ensavet eo ar c'hevredad gant daou pe meur a hinienn a ziviz dre gevrat dereiñ d'un embregadenn boutin madoù pe o oberiantiz e sell da rannañ ar gounid pe da dennañ splet eus an arboelladenn a c'hello disoc'hiñ diwar se.
Gallout a ra bezañ ensavet, e degouezhioù termenet gant al lezenn, dre akta bolontez un hinienn hepken.
Ar re gevredet a n' em ouestl da gemer perzh er c'holloù. »

En destenn-mañ e taolenna an embregerezh an obererezh boutin hag ar c'hevredad a zo an enkorfadur gwirel a gaso an embregerezh-se da wir.

E kemm gant seurtoù all a dudelezh – pergen ar c'hevredigezhioù –, ur c'hevredad en deus atav ur c'halvidigezh armerzhel (pourchas madoù ha servijoù da baeañ, genel spletoù pe arboelladennoù, hag o rannañ), gwezh a vez (ral a wezh) a-gevret gant ur c'halvidigezh sokial.

[kemmañ] Rummoù kevredadoù (er gwir gall)

[kemmañ] Kevredadoù kenwerzhel

Emañ ar c'hevredadoù-se dindan gwir ar c'henwerzh/an aferioù.

• Kevredad dizanv, pe Kevredad dre gevrannoù (KDG), a c'hell bezañ dezhañ stumm ur c'hevredad kevelouri broduiñ (KKP)
• Kevredad kevelourel
• Kevredad dre gevrannoù eeunaet, pe KDGE ;
• Kevredad dre gevrannoù eeunaet unperc'henn, pe KDGEU ;
• Kevredad Bevennet e Atebegezh, pe KEBAT, a c'hell ivez bezañ dezhañ stumm ur c'hevredad kevelouri broduiñ (KKP) ;
• Embregerezh unperc'henn bevennet e atebegezh, pe EUBAT (argemm ar C'HEBAT ennañ ur c'hevredat hepken) ;
• Kevredad gougemennet eeun (KGE) ;
• Kevredad gougemennet dre gevrannoù (KGDG) ;
• Kevredad dre anv boutin (KDAB).
• Kevredad dizanv sportour micherel ou KDSM
• Kevredad Europat (KE)

[kemmañ] Kevredadoù keodedel

An holl gevredadoù nann kenwerzhel a zo keodedel. Dindan ar gwir keodedel emañ ar c'hevredadoù-se.

• Kevredad keodedel (ar C'hevredad keodedel diloc'hvadoù (KKD) eo an hini anavezetañ),
• Kevredad Keodedel Micherel (KKM)),
• Kevredad Keodedel Araezioù (KKA),
• Kevredad embregvezh frank (KEF).

An tri diwezhañ-mañ a vod izili ar micherioù frank reolennet (kontourien-prizachourien, mezeien, breutaerien, ha c'hoazh) evit reiñ dezho an tu da embreger a-stroll ha da rannañ ar frejoù lojeiz ha framm (rannañ ur sekretourva, da skouer).