Jef Philippe
Diwar Wikipedia, an holloueziadur digor
Jef Philippe (Jef Fulup) a zo ur barzh hag ur c'haner breizhat. Ganet eo e Lokarn (22), er Follezoù Vras, d'an deiz kentañ a viz Ebrel 1947.
Taolenn |
[kemmañ] Buhez
E dad a oa anvet Fransiz Fulub (1907-1998) hag e vamm Julienne Ar C'hamm (1911-1995), o-daou o terc'hel douar. Tud paour a-walc'h e oant met joaus, hag e plije dezho dañsal, kanañ ha marvailhat. E-pad 5 bloaz en deus bevet eno e Lokarn. Goude se ez eo da chom da Gergrist-Moeloù (Kerne-Uhel) asambles gant e dud.
E dud a oa menajerien neuze. Ne oant ket pinvidik er familh dre ma oa 7 bugel en tiegezh. 20 vloaz a oa etre an hini henañ hag an hini yaouankañ. Aet eo an hini koshañ d’an anaon un toullad bloavezhioù 'zo. Jef Fulup a zo pempvet bugel ar familh.
Graet e veze ar re saovaj anezho abalamour ma teuent eus ur gêriadenn vihan a Gerne-Uhel Pa oant bihan ez aent d’an oferenn da Sant-Nigouden d'ar sul. Kaset e veze daou re votoù koat gant pep hini, ur re evit an hent hag ur re all evit an oferenn.
E vreudeur hag e c’hoarezed ac'h ae d’ober c’hoariva d'ar JAC (jeunesse agricole chrétienne). E brezhoneg e veze c’hoariet, rak an aotrou person a adskrive ar pezhioù-c’hoari e brezhoneg ar vro, da lâret eo e brezhoneg ar Vro-Fisel. Buan a-walc’h eo bet lakaet da labourat er gêr, ober a rae war-dro ar c’honikled ; gwerzhañ a rae anezho e marc’had Sant Nigouden. Kolist e veze neuze pa veze euredoù, hag e roe an dud un tamm gopr dezhañ e fin an eured.
[kemmañ] Studioù
E skol Kergrist-Moeloù, e oa jentil-tre e vistri-skol ; ne veze ket goapaet er skol.
Bet eo e skolaj Campostal e Rostrenn. Eno en deus kemeret perzh e laz-seniñ ar skol renet gant Denis Le Bozec, ur brezhoneger mat. El laz-kanañ renet gant an aotrou Taleg, bet skrivet gantañ levrioù diwar-benn tier Kreiz-Breizh, en deus kemeret perzh ivez. Eno, e-lec'h kanañ gospel, e oa bet respontet dezhañ e veze kanet e brezhoneg, hag eñ eürus o klevout se.
Bet eo bet goude-se e skol-veur Angers ha Roazhon d'an oad a 27 vloaz goude e goñje er bloavezh 1973 a-benn bezañ aotreeg war ar galleg.
[kemmañ] E vuhez vicherel
Kelenner eo bet war ar galleg hag ar brezhoneg e Gwengamp (22) e Lise an Itron-Varia abaoe m'eo deuet en-dro da Wengamp. 31 vloaz zo ez eo kroget da gelenn eno, hag emañ war e leve abaoe fin miz Kerzu 2007.
Bremañ emañ o chom e Koadoud (22) gant e wreg, bet savet tri a vugale ganto.
[kemmañ] Skrivañ kanaouennoù
Kemeret en deus bet perzh en arvestoù kanañ abaoe an oad a 18 vloaz. N'en deus ket skrivet kanaouennoù evit tud all rak ne gave ket tud all evit kanañ anezhe. A-wechoù ez eus bet tud all, hiniennoù, o kanañ ur ganaouenn bennak dezhañ evel An Tregeriz ha Soazig Nobletz eus Lannuon. Pa skrive kanaouennoù, er penn-kentañ, ne ouie ket skrivañ brezhoneg, neuze e skrive anezho gant ur skrivadur damfonetek hag e roe anezho da skipailh Fañch Danno ha Strollad Maria Prad goude.
Un nebeud bloavezhioù 'zo ez eus bet goulennet digantañ gant RKB sevel un abadenn bennak war ar glad. Graet en deus bet evel-se 18 abadenn, hag er bloaz-mañ en deus graet un abadenn war ar pezh en deus bet klevet evel kaner.
[kemmañ] Oberennoù
Al levr kentañ bet skrivet gantañ a oa ul levrig 50 pajennad diwar-benn iliz Boulvriag (e galleg).
Skrivet en deus ivez :
- En tu mañ d'an Ifern, un dastumad danevelloù, bet embannet gant Al Liamm.
- Telenn ar c'hi, ul levr barzhonegoù, bet skrivet pa oa en arme, Priz Langleiz e 1982.
- War roudoù Merlin e Breizh, ur studiadenn war ar pezh a van eus Merlin e spered an dud.
[kemmañ] Pennadoù-skrid
- Barzhonegoù
- "An Hader Ludu", Al Liamm Niv.172, p. 334
- "Gant ma genou digor (me 'fell din komz...)" , Al Liamm Niv. 172; p. 335
- "Noz", Al Liamm Niv. 173; p.413
- "Klemmgan ar c'hi telennour", Al Liamm Niv. 192; p.6
- "Dremm", Al Liamm Niv. 195; p.259
- "Ar Volz", Al Liamm Niv. 195; p.260
- "Tud", Al Liamm Niv. 195; p.261
- "Arvest", Al Liamm Niv. 317; p.5
- Danevelloù
- "Boudoù ar c'houmanant lusennek, spontadenn..." , Al Liamm Niv. 176; p.164
- "Burtul, ar suner-gwad", Al Liamm Niv. 177; p.243
- "An tornaod", Al Liamm Niv. 204; p.8
- "Lastez", Al Liamm Niv. 217; p.87
- Studioù
- Kanaouennoù
- "Chom bepred digor", Al Liamm Niv. 360; p.6
[kemmañ] Liammoù diavaez
- Un atersadenn eus Jef Fulup war "Kaouenn.net"
- Barzhonegoù lennet pe ganet gantañ war Gaouenn.net [1][2][3]
- Ar pennadoù savet gant Jef Fulup war Al Liamm
