Sid Meier

Aus Wikipedia

Der Àrtikl is im Dialekt „Owaöstareichisch“ gschriem worn.

Da Meier Sid.

Da Sid Meier (auf d'Wöd kéma 1954 in Detroit, Michigan) is a amearikanischa Kombjutaschbü-Brogramiara fu dém a boa fu de bekãntastn Schdrategi-Schbü wia de Civilization-Searie schdãman. Nåchdém a lãng fia de Fiama Microprose goawat håd, håd a 1996 mid saine Kolégn, in Jeff Briggs und in Brian Reynolds, a aigene Fiama grünt, nemli Firaxis Games. Unta Kombjutaschbü-Fraind güt da Sid Meier haid praktisch schã ois Legendn. Haid duad a åwa moastns neama söwa brogramian, sondan is fia s'Konzept und fia d'Ide fum Schbü zuaschdendi, wås ma in Amearika a Creative Director hoast.

[dro werkln] Sâi Lém

Da Sid Meier håd in Michigan Gschicht und Infoamatik schdudiad und håd auf an Atari 800 zan easchdn Måi a weng zan umadumbrogramian ãgfãngd. Im 1981ga Joa håd a in Bill Stealey kena gleant, dea a schã a weng a Eafoarung mid Kombjutaschbü ghåbt håd und gach drauf hãm dé zwoa d'Fiama Microprose grünt und ãgnfãnga aigane Iden fia Kombjutaschbü zan entwükin und zan famoaktn.

Bai Microprose han dãn in Sid Meier saine bekãntasnd Schü aussa kema, wia Silent Service, Pirates!, Railroad Tycoon, Civilization und Colonization. Dé Schbü woan dåmåis a grossa Eafoig, obwoi dé dåmåling Kombjuta waid ned aso guad woan wia haid und a de Schbü déswéng grafisch nu recht õafåch woan. D'Strategischbü fum Sid Meier woan åwa recht guad konzipiad und woan a hisdoarisch recht genau und hãm déswéng an Haufn Fens ghåbt. Drozdem is d'Fiama Microprose im 1994ga Joa in finanziele Schwiarigkaidn kema und is fu Spectrum HoloByte aufkauft woan. Auf dés aufi is da Bill Stealey wéga gãnga und zwoa Joa schbéda is a da Sid Meier wék.

Im 1996ga Joa håd da Sid Meier dãn gemainsãm mim Jeff Briggs, am ãndan Vetaran dea schã bai Civilization dabai woa, a naiche Fiama grünt, nemli Firaxis Games. Doat san dãn nåch lengara Zaid naiche Iden fum Sid Meier umgsézt woan und ois Kombjutaschbü aussa kema, wia Sid Meier's Gettysburg! und Sid Meier's Antietam!, dé oi zwoa um Schlåchtn im amearikanischn Biagakriag gengan. Schbéda han dãn naiche Veasionen fu ödare Schbü aussa kema, dé auf d'naiche béssane Kombjutadechnik ãbasst woan und a de Gschicht waida ausbaud hãm. Soichane Schbü fu Fireaxis han zan Baischbü Sid Meier's Alpha Centauri (1999), Sid Meier's Civilization III (2001), åwa a s'naiche Sid Meier's Pirates! (2004) und Sid Meier's Railroads! (2006). S'ola naichasde Schbü fu Firaxis Games is Civilization Revolution, wås im Juni 2008 aussa kema soid und wida a Foatsézung fu da Civilization-Seria wean wiad.

Da Sid Meier lébt haid mid saina Frau, da Susan, und mid saim Buam, in Ryan, in Hunt Valley, Maryland. Saine Schbü hãm oiwai nu an Haufn fu Fens und said 1999 is a sogoa ois zwoata Schbüentwikla iwahaupt in de Academy of Interactive Arts and Sciences' Hall of Fame aufgnuma woan. Da easchde woa da Japana Shigeru Miyamoto fu Nintendo. Im Jena 2008 håd aussadem de CMP Game Group bekãnt gém, das da Sid Meier an Lifetime Achievement Award griagt, dea auf da Game Developer's Conference iwaraicht wean soid.

[dro werkln] Brétschbü Foabüda

D'Ide fia a boa fu dénane Schbü håd da Sid Meier fu Brétschbü ghåbt, dé fum Francis Tresham eafundn woan san und bai da Fiama Hartland Trefoil Ltd. aussa kema san. Es gibt zan Baischbü a Brétschbü dés Civilization hoast und in da Grundschdrukdua so enlich is wia s'Kombjutaschbü fum Sid Meier, håid neta ned aso komplex. S'Schbü Railroad Tycoon basiad auf'n Aisnbã-Schbü 1829 fum Tresham, wås a im Kombjutaschbü dãnkboa ãgém wiad und a fia's Schbü Pirates!, wås d'Gschciht fu de Piaratn in da Karibik in da Kolonialzaid nåch schbüd, gibt's a Brétschbü-Foalåg dé Spanish Main hoast. Nåchdém d'Kombjuta-Veasionen fu de Schbü komeaziel recht eafoigraich woan han, håd's natiali Diskusionen gém wégam Copyright fu da uaschbringlichn Ide dazua und déswéng håd Microprose a im 1998ga Joa d'Brétschbü-Fiama Hartland Trefoil Ltd. kauft.

[dro werkln] Saine Schbü

Floyd of the Jungle (1982), Jump'n'Run
Chopper Rescue / Air Rescue (1983), Actionsschbü
Hellcat Ace (1982), Flugsimulazion
Spitfire Ace (1983), Flugsimulazion
Solo Flight (1984), Flugsimulazion
F-15 Strike Eagle (1985), Flugsimulazion
Crusade in Europe (1985), Strategi-Schbü
Conflict in Vietnam (1985), Strategi-Schbü
Decision in the Desert (1985), Strategi-Schbü
NATO Division Commander (1985), Strategi-Schbü
Silent Service (1985), U-Boot-Simulazion im Zwoatn Wödgriag
Gunship (1986), Kãmpfhubschrauwa-Simulatoa
Pirates! (1987), Strategi- und Action-Schbü in da Piaratnzaid
Red Storm Rising (1987), U-Boot-Simulazion
F-19 Stealth Fighter (1988), Flugsimulazion
Sid Meier's Railroad Tycoon (1990), Wiatschåftssimulazion aus da Ãfãngszaid fu Aisnbã
Sid Meier's Covert Action (1991), Strategi und Agenten-Adventure
Sid Meier's Civilization (1991), Strategi-Schbü
Sid Meier's Colonization (1994), Strategi-Schbü
Sid Meier's Civilization (Computerspiel)|Sid Meier's Civilization II]] (1996), Strategi-Schbü
Sid Meier's Gettysburg! (1997), Echtzaid-Strategi-Schbü ausn amearikanischn Biagakriag
Sid Meier's Antietam! (1998), Echtzaid-Strategi-Schbü ausn amearikanischn Biagakriag
Sid Meier's South Mountain! (199x), Echtzaid-Strategi-Schbü ausn amearikanischn Biagakriag
Sid Meier's Alpha Centauri (1999), Strategi-Schbü
Sid Meier's SimGolf|Sid Meier's SimGolf (2002), Goif-Menedscha-Simulazion
Sid Meier's Civilization III (2002), Strategi-Schbü
Pirates!|Sid Meier's Pirates! (2004), naiche Veasion fum Piaratn-Klassika
Sid Meier's Civilization IV (2005), Strategi-Schbü
Sid Meier's Railroads! (2006), naiche Veasion fum Aisnbã-Klassika