তেজপুৰ
From Wikipedia
তেজপুৰ শোণিতপুৰ জিলাৰ এখন প্ৰধান নগৰ৷ ই ব্ৰহ্মপুত্ৰ নদীৰ পাৰত, ১৮১ কিলোমিটাৰ গুৱাহাটীৰ পূবত অৱস্থিত৷ বৰ্তমান শোণিতপুৰ জিলাৰ প্ৰধান নগৰ তেজপুৰ ঐতিহাসিক সম্পদৰ কাৰণে ভাৰত বিখ্যাত৷ তেজপুৰ নামটোৰ ঐতিহাসিক কাহিনী এনেধৰণৰ৷ এসময়ত তেজপুৰত বান নামৰ এজন ৰজাই ৰাজত্ব কৰিছিল, তেওঁ আছিল অসুৰৰ ৰজা৷ বান ৰজাৰ জীয়ৰী উষাই সপোনত এজন কোঁৱৰক দেখা পায় আৰু তেওঁৰ প্ৰেমত পৰে৷ তেওঁ চিত্ৰলেখাৰ সহায়ত সেই কোঁৱৰজন ভগৱান শ্ৰীকৃষ্ণৰ নাতি অনিৰুদ্ধ বুলি গম পায় আৰু দুয়োৰো মাজত প্ৰেমৰ সম্পৰ্ক স্থাপিত হয়৷ বান ৰজাই সেই কথা গম পাই উষাক অগ্নিৰ দ্বাৰা আৱৰি থকা এটা ঘৰৰ মাজত বন্দী কৰি ৰাখে৷ সেই ঘৰটোক অগ্নিগড়ৰ বোলে৷ কিন্তু অনিৰুদ্ধই উষাৰ সখীয়েক শিল্পী চিত্ৰলেখাৰ সহায়ত উষাক লাভ কৰে আৰু গন্ধৰ্ব প্ৰথাৰে বিবাহ কৰে৷ এই কথাত বান ৰজা আৰু শ্ৰীকৃষ্ণৰ মাজত যুদ্ধ আৰম্ভ হয়৷ এই যুদ্ধত হাজাৰ হাজাৰ যোদ্ধাৰ মৃত্যু হয় চাৰিওফালে তেজৰ নৈ-বৈ যায়৷ ইয়াৰ ফলতেই এই ঠাইৰ নাম তেজপুৰ (তেজৰ নগৰ) লাভ কৰে৷ বান ৰজা আছিল প্ৰধানত শিৱ ভক্ত৷ শেষত শিৱ আৰু কৃষ্ণৰ মাজতো কীৰ্তনত বৰ্ণিত বিখ্যাত হৰি-হৰ যুদ্ধৰ সৃষ্টি হয়৷
তেজপুৰ কলা, সংস্কৃতি, সাহিত্য আৰু প্ৰাকৃতিক সম্পদৰ ফালৰ পৰা অতিমনোমহা নগৰ৷ ইয়াতেই অসমীয়া সাহিত্যৰ বহুকেইজন বিশিষ্ঠ ব্যক্তিৰ জন্ম হয়৷ চন্দ্ৰ কুমাৰ আগৰৱালা, আনন্দ্ৰ চন্দ্ৰ আগৰৱালা, দন্দি কলিতা, কমলাকান্ত ভট্টাচাৰ্য্য, আদি সাহিত্যিকৰ জন্ম হয়৷ "ৰূপকোঁৱৰ"জ্যোতিপ্ৰসাদ আগৰৱালাই তেজপুৰতেই প্ৰথম অসমীয়া চলচিত্ৰ 'জয়মতী'ৰ সাকলো কাম সম্পাদনা কৰে৷ আনহাতে শোণিতপুৰ জিলাৰ অন্তৰ্গত 'গহপুৰ'আৰক্ষী চকিত ১৯৪২ চনত ব্ৰিটিছৰ বিৰুদ্ধে আন্দোলন কৰিবলৈ গৈ আৰক্ষী চকিৰ ওপৰত ত্ৰীৰঙ্গ পাতাকা উত্তোলন কৰি ১৪ বছৰীয়া কনকলতাৰ আৰক্ষীৰ গুলিত নিহত হয়৷ তেজপুৰ নগৰৰ উল্লেখযোগ্য ঠাই :
- ১. চিত্ৰলেখা উদ্যান : ইয়াক ১৮০০ শতিকাত ব্ৰিটিছ ডেপুটি কমিচনাৰে প্ৰতিষ্ঠা কৰিছিল৷
- ২. মহাভৈৰৱ মন্দিৰ : তেজপুৰৰ প্ৰধান বজাৰ চৌকি বজাৰৰ পৰা ১ কিঃমিঃ উত্তৰত অৱস্থিত প্ৰধান শিৱ মন্দিৰ৷
- ৩. অগ্নিগড় : বান ৰজাই নিজৰ জীয়েক উষাক বন্দী কৰি ৰাখিবৰ কাৰণে ইয়াক নিৰ্মাণ কৰিছিল৷ ইয়াৰ চাৰিওফালে জুই জলাই ৰখা হৈছিল বাবে ইয়াৰ নাম অগ্নিগড়৷ ই অসমীয়া প্ৰেমৰ এটা উত্কৃষ্ট নিৰ্দৰ্শন৷
- ৪. দ-পৰ্বতীয়া : তেজপুৰ নগৰৰ পৰা 6 কিঃমিঃ দক্ষিণত ই অৱস্থিত৷ ই পুৰণি অসমৰ স্থাপত্য আৰু ভাস্কয্যৰ নিদৰ্শন বহন কৰিছে৷
- ৫. বামুনী পাহাৰ : কলাত্মক সৌন্দৰ্য্যৰ কাৰণে ই বিখ্যাত৷ ইয়াক নৱম দশম শতিকাৰ সময়ত নিৰ্মান কৰা হৈছিল৷
- ৬. হাজাৰা পুখুৰী : ই প্ৰায় 70 একৰ মাটি আৱৰি থকা তৃতীয় বৃহত্মম জল সংৰক্ষিত এলেকা৷
- ৭. ক'ল পাৰ্ক : তেজপুৰ নগৰৰ ই এখন মনোমহা ঠাই৷ প্ৰথম ব্ৰিটিছ ডেপুটি কমিচনাৰ
মিঃ ক'লে ইয়াক স্থাপন কৰিছিল৷