Dragón

De Biquipedia

O dragón (d'o latín draco, e iste d'o grieco drakon, "gripia" u "serpient") ye un animal fantestico mui conoxito en Europa e Asia.

Basicament ye una gran serpient con dos garras, u á begatas cuatro, e con una parella d'alas. O suyo rostro, asinas como atras partis d'o cuerpo, gosan estar más relazionatas con terzers animals, como lions u bous. En toz os puestos se diz que os dragons pueden itar fuego por a boca e son capables de cremar cualsiquier cosa.

Normalment son salbaches e malinnos. Matan as ramatas e os suyos amos. Asobent cusiran grans tresors en solitario e tienen una gran sabiduría. Los esfensan mientres largos tiempos debito á la suya larga bida e á la capazitat de beyer encluso cuan son durmiendo ya que no'n tién de parpagos, igual que as serpients.

[editar] Dragons en Aragón

O dragón ye un animal mui relazionato con a mitolochía aragonesa e con o patrón d'Aragón, San Chorche.

Destaca a falordia d'o Dragón d'Uruel que bibiba en a Peña Uruel, amán de Chaca. Se deziba que a mirata d'os dragons innotizaba á qui la güellaba, por ixo un caballero aragonés aprofeito isto ta matar á lo dragón. Pulió lo suyo escudo, como un mirallo e puyó enta la espelunga á on bibiba o dragón fendo que iste mira-se o escudo e s'innotiza-se con a suya propia güellata mientras o caballero le amortaba.

Pietro IV estió lo primer rei d'Aragón que emplegó lo simbolo d'o dragón alato en o suyo casco de combate. Se diz que os soldatos d'Aragón chilaban en as barallas Por San Chorche, D'Aragón!, por o cualo teneba probablement un dople sentito l'adopzión d'o dragón como simbolo d'os reis d'Aragón, a relazión con o suyo patron e o parexito fonolochico con o nombre d'o país.

Más tardi os simbolo eraldico d'o dragón (o "drac alat" en catalán) en Balenzia e atros territorios d'a corona se combirtió por o suyo parexito en un murziacalo ("rat alat" en catalán).