Cánzer (constelazión)
De Biquipedia
| Cánzer | |
 |
|
| Nombre en latín | Cancer |
| Alcorzamiento | Cnc |
| Simbolo |  |
| Chenitibo | Cancri |
| Sinificato en aragonés | o candrexo |
| Aszensión reuta | 9 h |
| Declinazión | 20° |
| Bistero ta latituz | entre -60° e +90° |
| Millor bisibilidá en | marzo |
| Aria total | 506 graus cuadratos |
| Lumero d'estrelas con magnitú aparén < 3 |
0 |
| Estrela más luminosa - Magnitú aparén |
Al Tarf (β Cnc) 3.5 |
| Plebia de meteoritos |
|
| Constelazions con que muga |
|
Cánzer u Cancer (o candrexo) ye una de as constelazions d'o zodiaco, situata entre a constelazión de Cheminucos á l'Ueste e a de Leo á l'Este. Á lo Norte, se troba la constelazion de Lupo zerbal. Á lo Sur, a d'o Can menor e la d'Idra.
A constelazión tamién da o suyo nombre á lo Tropico de Cánzer.
Contenius |
[editar] Carauteristicas e ochetos
Ista constelazión ye chiqueta e sin estrelas guaire luminosas; α Cancri nomás que tiene una magnitú 4.2. Cánzer ye conoxita ta muitos afizionatos á l'astronomía como la constelazión an que se troba Praesepe (M44), o presepe u presepera, un carrazo estelar ubierto an bi ye a estrela η Cancri, que puede alufrar-se con uns prismaticos. O Presepe abraca más d'un grau cuadrato, alufrando-se á simple güello como una luz difusa. Dintro d'o Presepe, encara que dezaga d'él bien luen, bi ha un grupo de galacsias que pertenix á lo carrazo de Coma-Birgo, beyibles que con telescopios meyanos. D'altros ochetos d'o zielo profundo que se troban en Cánzer son M67, un carrazo estelar ubierto bien biello, conoxito dende tiempos antigos, e NGC 2775, una galacsia espiral de magnitú 11.3. En una nueit clara, pueden alufrar-sen á güello en a constelazión bellas 50 estrelas. A estrela zeta d'a constelazión ye una estrela triple.
[editar] Mitolochía
A constelazión retraye bagamén a fegura d'un candrexo, o que, chunto con a constelazión d'Idra, podría dar orichen á lo mito de l'Idra de Lerna, un d'os Doze Treballos d'Eracles con que s'asozía.
Tamién se diz de Cánzer que estió lo puesto ta o Sol acadio d'o Sur, puede estar que per a suya posizión ta o solstizio d'ibierno en l'antiguidá. Dimpuesas s'asoziaría con o cuatreno mes, duzu, o paso de chunio á chulio en o calendario ozidental moderno, e se conoxería como la Puerta Norte d'o Sol.
Con tan pocas estrelas, estando istas tan poco luminosas, Cánzer yera á ormino bisto como un "Sino Escuro", descrito como negro e sin güellos. Dante en fa referenzia en o canto XXV d'o suyo Paradiso:
- Poscia tra esse un lume si schiarì
- sì che, se ’l Cancro avesse un tal cristallo,
- l’inverno avrebbe un mese d’un sol dì.
- (Dimpuesas una luz entre éls loziba
- que si Cánzer tenese tal cristal,
- lo ibierno abría un mes d'un solo día.)
[editar] Istoria d'o nombre
O nombre en sanscrito d'ista constelazión estió Karka e Karkata; en tamil, Karkatan, e en singalés, Kathaca. Os indús posteriors la conoxioron como Kulira, d'o grieco Κολουρος (Koluros), o bocable dato per o filosofo Proclo.
Arato la clamó Καρκινος (Karkinos), nombre que continó con Iparco e Ptolemeu. A forma latinizata, Carcinus, aparixió en as Tablas Alfonsinas de Toledo. Eratostenes estendilló lo nombre á Καρκινος, Ονοι, και Φατνη (Candrexo, Burros e Presepe).
O nombre de Litoreus (que abita la costa) ye de Manilio e d'Obidio. Belaltros escritors clasicos en dizen Astacus e Cammarus. Nepa aparix en o De Finibus de Zizerón, e en as obras de Columela, Plauto e Barrón. (Totas tienen o sinificato de "candrexo", "petingana" u "gricha", u "alacrán").
Seguntes Kircher, en o Echipto d'os coptos yera Κλαρια, a Bestia seu Statio Typhonis, o Poder d'a Escuridá. La Lande la relazionó con Anubis, una d'as dibinidaz echipzias que gosan d'asoziar-se con Sirio.
[editar] Astrolochía
En l'astrolochía ozidental, o sino de Cánzer (21 de chunio-22 de chulio) ye asoziato con o elemento augua; ye, pues, un de os tres sinos d'augua, chunto con Escorpio e Piszis. Ye tamién un de os cuatre sinos cardinals, chunto con Aries, Libra e Capricornio. En Cánzer tien o suyo domizilio la Luna, feito que podría prozeder de l'antiga creyenzia que consideraba ixe o puesto primichenio d'a luna en l'inte d'a creyazión d'o mundo. O suyo oposato ye Capricornio. D'entre as partis d'o cuerpo, Cánzer gubierna o peito e lo estomaco.
As cualidaz que os astrologos acostumbran á acumular-li son os d'un caráuter sensible, imachinatibo, de gran memoria e amor per a familia, debez que sentito, bulnerable, cambiadero e muito aprebenito.
