Aries
De Biquipedia
| Aries | |
 |
|
| Alcorzamiento | Ari |
| Simbolo |  |
| Chenitibo | Arietis |
| Sinificato en aragonés | o mardán |
| Aszensión reuta | 3 h |
| Declinazión | 20° |
| Bistero ta latituz | entre -60° e +90° |
| Millor bisibilidá en | abiento |
| Aria total | 441 graus cuadratos |
| Lumero d'estrelas con magnitú aparén < 3 |
2 |
| Estrela más luminosa - Magnitú aparén |
Hamal (α Ari) 2.0 |
| Plebia de meteoritos |
|
| Constelazions con que muga |
|
Aries (o mardán) ye una de as constelazions de o zodiaco, situata entre a constelazión de Piszis á l'Ueste e a de Tauro á l'Este.
Contenius |
[editar] Carauteristicas
As estrelas d'Aries no son guaire luminosas, fueras de Hamal (α Arietis) e Sharatan (β Arietis).
[editar] Ochetos
Os pocos ochetos de o zielo prefundo d'Aries tampoco no brilan guaire. Abracan as galacsias NGC 697 (á lo Norueste de β), NGC 772 (á lo Sureste de β), NGC 972 (en l'anglo á lo Norte de a constelazión) e NGC 1156 (á lo Norueste de δ).
[editar] Mitolochía
Si s'encluyen as estrelas más esmortexitas, bisteras á güello umano, o conchunto se retraye á la capeza d'un mardán.
En a mitolochía grieca, s'identificaba con o mardán que portó á os fillos d'Atamán, Fricso e Ele, ta la Colquida, fuyindo asinas de a suya madrastra Ino. Ele cayó en o mar que más tardi lebaría o suyo nombre, Mar d'Ele u Elesponto. Malas que i plegó en un puesto ya seguro, Fricso sacrificó lo mardán e en pinchó lo pellón en una carrasca de a selba d'Ares, an se tornó d'oro, estando dimpués a razón de o biache de Chasón e os argonautas. Parex que as antigas zebilizazions de Babilonia, Grezia, Persia e Echipto s'enzertoron en dar á ista constelazión o nombre d'un mardán.
L'aria de o zielo que abraca la constelazión d'Aries, con parti de as de Piszis, as Crapetas e Andromeda, podrían estar l'orichen de o mito de o zenturón d'Ipolita, que ye parti de os doze treballos d'Eracles.
[editar] Astrolochía
En l'astrolochía ozidental, o sino d'Aries (21 de marzo-19 d'abril) ye asoziato con o elemento de o fuego; ye, pues, un de os tres sinos de fuego, chunto con Sachitario e Leo. En Aries tien o suyo domizilio Marte e a suya esaltazión o Sol. Ye un de os cuatre sinos cardinals, chunto con Libra, Capricornio e Cánzer. O suyo oposato ye Libra. D'entre as partis de o cuerpo, Aries gubierna la capeza.
As cualidaz que os astrologos acostumbran á acumular-li son os d'un caráuter emprendedor, empulsibo, optimista e apasionato, debez que autoritario, muito atribito, inchenuo e egozentrico.
