Buxaruala
De Biquipedia
| Buxaruala | ||||||||||||||||
|---|---|---|---|---|---|---|---|---|---|---|---|---|---|---|---|---|
 Buxaruala (Arctostaphylos uva-ursi), plena de lulos |
||||||||||||||||
| Clasificazión zentifica | ||||||||||||||||
|
||||||||||||||||
| Nombre binomial | ||||||||||||||||
|
(L.) Spreng., 1825 |
La buxaruala u buxareta (Arctostaphylos uva-ursi (L.)) ye un arbusto perennifolio d'a familia d'as ericazias.
Una espezie amanata, la buxaruala d'os Alpes (Arctostaphylos alpina (L.) Spreng.), ye de fuella caduca, flor blanco-berdenca e lulo negro.
Contenius |
[editar] Denominazión
Lo nombre zientifico d'a buxaruala ye Arctostaphylos uva-ursi, d'orichen greco-latín. Consiste n'a repetizión d'un apelatibo, "uga d'onso", que dan á lo lulo: en grieco, arctos ("onso") e staphylos ("carrazo d'uga"); e en latín, uva-ursi ("uga d'onso").
Los nombres populars en aragonés son deribazions d'o buxo, prinzipalmén buxaruala (pronunziato de muitas trazas diferens, e relazionato con o franzés busserole e lo catalán boixerola), pero tamién buxareta (buixereta en benasqués), buxalina, etz.
[editar] Descripzión
[editar] Caracteristicas
La buxaruala ye un arbusto pomputo, d'una altaria regular que ba de 15 á 30 cm. Esparde las suyas brancas, tenditas per tierra u pinchaderas, que plegan ta 1 u 2 m de largaria, de crosta de color royisca e fázil de desprender-sen. D'ellas, en rechitan rametas con as fuellas amuntonatas á un estremo, de color berda escura e lustrosas. Lo follache ye simple, alterno e obobato. Las flors son blanquiñosas u rosazias, en forma de copa, e de primabera s'acarrazan. Lo lulo, á bels puestos dito manzaneta, ye carnoso, d'una color roya prou biba cuan ye beroso, e con a carne de color blanca u sora, minchable, pero de sabor xasca e poco sucosa.
Toma en cualsiquier tipo de suelo, anque s'estima més de fer-lo en terrens secos, frescos, azetos u neutros. Ye sensible á la umedat estancata e de medro muito lento.
- Climas: normal, fredo, solano
- Interés: flors (meliferas), lulos decoratibos, no comestible
[editar] Florata
La buxaruala florex dende marzo dica chunio, seguntes l'altitut, e los lulos emberan ta la fin d'o berano u ta d'agüerro.
[editar] Ábitat
L'ábitat d'a buxaruala abraca buena parte d'Europa, Asia e America d'o Norte. N'a peninsula Iberica, s'esparde sobre tot per lo zentro e la metat oriental, dende los Pirinés e lo Sarrallón Cantabrico dica lo Sarrallón Penibetico.
Ocupa á ormino las clapas de carrascars, caxicars, e pinars, preferindo las costeras petrosas e las collatas umedencas d'os mons.
[editar] Istoria
La buxaruala se documentó per primer begata á The Physicians of Myddfai, obra galesa sobre yerbas d'o sieglo XIII. Estió tamién descrita per Clusius en 1601 e recomendata ta uso medezinal, sobre tot per Gehard, en 1763. Fizió la suya aparizión n'o London Pharmacopoeia en 1788.
[editar] Usos
Marco Polo escribió que, n'o sieglo XIII, los chinos lo emplegaban como diuretico t'os riñons e los problemas urinarios. Los amerindios tamién en feban uso ta ixos problemas pero ta tratar belas malautias benerias, los calculos urinarios, la zistitis e la uretritis, e la obesidat. Los colonos americans la emplegoron igualmén contra la nefritis. Güe encara se fa serbir á cualques países, como Polonia.
Las suyas fuellas s'utilizan n'a industria d'o tabaco. Belas etnias amerindias la encorporaban á las yerbas ta fumar.
Los suyos lulos pueden emplegar-sen ta fer confitura.
[editar] Farmacopea
- Propiedaz: diuretica, astrinchén, antilitiasica, antiflochistica.
- Parte usata: fuella.
L'arbutina e la metilarbutina son d'ordinario eliminatas per lo riñón mientres que son trasformatas en idroquinona, que exerze una aczión sedán e antiflochistica. La buxaruala ye conoxita dende abe tiempo per lo suyo efeuto diuretico e antiseptico natural d'as bías urinarias n'o causo de zistitis, enuresi e incontinenzia.
