Ufnau

Us der alemannische Wikipedia, der freie Dialäkt-Enzyklopedy

Insle Ufnau
Insel Ufnau (Ufenau)
Kännzahle
Flächi:	112'645 m²
Mittleri Längi:	470 m (Ost-West)
Mittleri Breiti:	220 m (Nord-Süd)
Laag:	701500 / 230500 (Schwiizer Landeskoordinate)
Dischtanze:	Rapperschwiil: 2.5 km Pfäffikon SZ: 1.0 km
Bsunderheite:	Chile St. Peter und Paul (erbaut 1141) Martinskapelle S Grab vom Ueli vo Hutte

Dialäkt: Züridütsch (See)

D Ufnau (743: Ubinauuia; 1259: Ufenowe; 1667: Uffnauw) isch di gröschti Insle im schwiizerische Zürisee und liit mit ihrer Nachberinsle Lützelau nööch bi dr Halbinsle Hurde. Ihre korrekte Name Ufnau wird vom Chloschter offiziell wider verwendet. Viilfach wird au Ufenau benutzt.

D Insle ghört zum Territorium vo dr Gmeind Freiebach und befindet sich im Eigetum vom Chloschter Einsidle.

[ändere] Gschichtlichs

Scho während dr Römerziit isch uf dr Insle en gallo-römische Tempel gschtande. Siini Fundament sind i de Grundmuure vo dr Chile St. Peter enthalte. E erschti Chile isch wahrschiinlich im Jahr 500 a dr Schtell vo dr hütige Kapelle St. Martin errichtet worde. Im 9. Jahrhundert hät d Herzogin Reginlinda d Chile St. Peter erbaue laa, denäbed es Wohnhuus, wo sie zäme mit ihrem jüngschte Sohn, em schpäter heilig gschprochene Adalrich drin gläbt hät. Er isch um 973 uf dr Insle gschtorbe. Siini Reliquie sind bis zum Villmergerchrieg 1712 imene Schrein in St. Peter gläge. Am 23. Januar 965 hät de Kaiser Otto I. d Ufnau em Chloschter Einsidle gschänkt. Wo während dr Helvetik sämtlichi Chlöschter für churzi Ziit uufghobe worde sind, hät dr Kanton Linth d Insle an en Privatmaa verchauft. Mit dr Mediationsverfassig isch s Chloschter Einsidle widerhergschtellt worde und hät d Insle 1805 zrugg kauft.

Uf dr Ufnau isch am 29. August 1523 dr Humanischt Ueli vo Hutte gschtorbe. Si isch drum au erwähnt im Gedichzyklus Huttens letzte Tage vom Conrad Ferdinand Meyer.

[ändere] Aktuell

Sitdem im Jahr 2005 binere kommunale Volksabstimmig vom Souverän bestimmt worde isch, dass kei öffentlichi Schtüürgälder für Renovation vo dr Insle und siine Baute sölled verwändet werde, setzt sich en private Verein defür ii, dass s nötige Geld für Reparature und Inschtandsetzige vo dr Chile, dr, Kapelle, dr Wirtschaft "Zu den zwei Raben" und de Schpazierwäge zämechunnt. Erschti Bauiigabe sind im Auguscht 2006 gmacht, bald wird mit de Bauarbeite aagfange.

Dr privati Verein will defür sorge, dass d Ufnau imene möglichst unberüehrte Rahme wiiter beschtaat, drum isch dr Name vo siim Projekt auf Insel der Stille.