Ruth Metzler-Arnold
Us der alemannische Wikipedia, der freie Dialäkt-Enzyklopedy
 |
Dialäkt: Züridütsch (See) |
D Ruth Metzler-Arnold (* 23. Mai 1964 in Willisau), Bürgerin vo Richenthal, Willisau und vo Balgach, isch e ehemaligi Schwiizer Bundesrätin (CVP).
Inhaltsverzeichnis |
[ändere] Ausbildung und Beruf
Nach eme Schtudium vo de Recht a dr katholische Universität Freiburg hät d Ruth Metzler zäme mit ihrem Gatte Lukas Metzler in Kanton Appezell-Innerrhode übergsiedlet.
I dere sehr konservative Umgebig isch sie, obwohl Zuezogeni und Frau, rasch bekannt und schliesslich vo dr Landsgemeinde 1997 als Vertreterin vo dr CVP zur kantonale Finanzminischterin (dr sog. "Säckelmeischterin") gwählt worde. Das isch aber nur es Teilziitmandat gsii; denäbe hät si in St. Galle binere Wirtschaftsprüefigsgsellschaft gschaffet.
[ändere] Wahl in Bundesrat
Ufgrund vo ihrer schwindende Wählerschtärchi hät d CVP 1999 müesse befürchte, nach de im Oktober fällige Nationalratswahle eigentlich nümme Aaschpruch uf zwei Sitz im Bundesrat z haa. Drum sind di beide CVP-Bundesrät Arnold Koller und Flavio Cotti scho im Früehling, neun Mönet vor em ordentliche Uuslaufe vo ihrer Amtsziit, zruggträte, um unverbruuchte Chräft als Wahllokomotive Platz z mache und i dr Hoffnig, dass es s Parlament nöd waage würdi, bi dr Beschtätigungswahl vo dr Landesregierig im Herbscht es erscht grad gwählts Mitgliid vo dr Landesregierig scho wider abzwähle.
Für d Nachfolg vom Appezeller Bundesrat Arnold Koller isch deboi scho früeh e Frauekandidatur in Vordergrund träte. Di uusserhalb vo Appezell gänzlich unbekannti Ruth Metzler hät zerscht ufgrund vo ihrer gringe Erfahrig und ihrer fehlende Kenntnisse vom eidgenössische Politbetrieb nur als Ussesiiterin gulte; si hät jedoch mit ihrer Jugend und ihrem unbekümmerte, sympathische Uuftrete bald e positivi Grundschtimmig uufbaue chönne. So isch si vo dr CVP nebed dr St. Galler Finanzminischterin Rita Roos als offizielli Kandidatin uufgschtellt worde.
Am 11. März 1999 isch d Ruth Metzler im vierte Wahlgang und mit acht Schtimme Mehrheit (126:118) vo dr Schwiizerische Bundesversammlig in Bundesrat gwählt worde. D Schtimme sind debii hauptsächlich us em rechte Parteieschpektrum choo, wil d Ruth Metzler als technokratischer und weniger sozial iigschtellt gulte hät als d Rita Roos.
[ändere] Als Bundesrätin
I dr Landesregierig hät sie ufgrund vo ihrer Uusbildung das am eheschte uf si zuegschnittene Eidgenössische Juschtiz- und Polizeidepartement übernaah. Deet hät sie sofort mit mehrere heisse Iise z tue ghaa, vor allem mit dr Flüchtlingswelle im Gfolg vom Kosovochrieg. In de folgende Jahre isch es ihr jedoch glunge, für sämtlichi von ihre vertretene Vorlage i dr Volksabschtimmig e Mehrheit z finde.
Sie isch im Jahr 2003 Vizepräsidentin vo dr Schwiizerische Eidgenosseschaft gsii und hett wahrschiinlich im Fall vo ihrer Widerwahl 2004 s Bundespräsidium aaträte.
[ändere] D Abwahl
D Nationalratswahle im Herbscht 2003 händ zu wiitere empfindliche Schtimmeverluscht für dr Ruth Metzler ihre Partei CVP gfüehrt, während di rechtsbürgerlichi SVP wiederum schtarch zuegleit hät und Aaspruch uf en zweite Sitz i dr Landesregierig erhobe hät (Zauberformle). Tatsächlich hät d Bundesversammlig d Ruth Metzler am 10. Dezember als erschts amtierends Regierigsmitglied sit 1872 nöd wiedergwählt und hät de Christoph Blocher a ihri Schtell gsetzt.
Die verweigereti Widerwahl vo de Ruth Metzler-Arnold isch erscht dr dritti entsprechendi Vorfall sit dr Gründig vom Schwiizerische Bundesschtaat 1848 gsii.
[ändere] Aktuell
D Ruth Metzler isch sit April 2005 als Chefjurischtin und Mitgliid vo dr Gschäftsleitig vo Novartis Frankriich tätig. Sie hät ihre Wohnsitz vo Appezell-Innerrhode uf Paris verleit.
[ändere] Literatur
- Marc Comina: Macht und Zwietracht im Bundeshaus. Die Hintergründe zur Abwahl von Ruth Metzler. Werd-Verlag, Zürich 2004, ISBN 3-85932-476-4
- Ruth Metzer-Arnold: Grissini und Alpenbitter. Meine Jahre als Bundesrätin. Appenzeller Verlag, Herisau 2004, ISBN 3-85882-388-0
| Vorgänger Arnold Koller |
Mitgliid im Schwiizer Bundesrat 1999-2003 |
Nachfolger Christoph Blocher |
[ändere] Weblinks
- Literatuur vo und über Ruth Metzler-Arnold im Kataloog vor DNB
- Website vo de Ruth Metzler-Arnold
- Das Herren-Komplott, Artikel i dr Ziitschrift Facts
| Persoonedaate | |
|---|---|
| NAME: | Metzler-Arnold, Ruth |
| ALTERNATIVNAMEN: | Ruth Metzler |
| KURZBESCHREIBUNG: | Schwiizerer Politikerin, alt Bundesrätin |
| GEBURTSDATUM: | 23. Mai 1964 |
| GEBURTSORT: | Willisau, Kanton Luzern, Schwiiz |
| STERBEDATUM: | |
| STERBEORT: | |
Dr Artikel basiert uf ´ra freie Ibersetzung vum Artikel „Ruth Metzler-Arnold“ us dr dytsche Wikipedia. E Lischte mit de dörtige Autore kasch dörte aluege
