Koup
vanuit Wikipedia, die vrye ensiklopedie.
Die Koup is 'n distrik in die Karoo. Die streek is veral vir skaapboerdery bekend, maar daar word ook met olywe, uiesaad, vrugtebome en volstruise geboer. Sy eerste geskiedenis is verweef met veeboere wat tussen 1750 en 1760 hier aangekom het. 'n Mnr. P.E. Kruger het in 1755 van die eerste weilisensies gekry, maar permanente inwoners was jare lank skaars omdat droogtes en inheemse Khoi-stamme die lewe moeilik gemaak het.
Die naam van die distrik kom waarskynlik van 'n Khoi-woord, houp, of "maagvet". Volgens oorlewering hou dit verband daarmee dat skape in dié streek so vet kan word en omdat die geil, blink gras ná 'n goeie reënseisoen soos die binnevet van 'n skaap lyk.
