Brilpikkewyn
vanuit Wikipedia, die vrye ensiklopedie.
Die brilpikkewyn (Spheniscus demersus) (familie Spheniscidae (pikkewyne)) is endemies aan die wes- en suidooskuste van Suider-Afrika en die enigste pikkewyn wat in ons gebiedswater broei. Wetenskaplikes het vroeër gedink pikkewyne is so ongewoon dat hulle aan ‘n baie vroeë tak van voëlevolusie behoort, maar onlangse navorsing het getoon hulle is eintlik maar net verwante van stormvoëls wat baie goed aangepas is om in die water te lewe. Die digte vere beskerm die pikkewyne teen die koue water, en die vlerke is omgevorm sodat die voëls as ’t ware onderwater vlieg. Pikkewyne hou hul lywe horisontaal as hulle swem, maar hulle loop regop op land. Die voëls vorm groot broeikolonies langs die see. Brilpikkewyne lê gewoonlik twee eiers wat beurtelings deur die mannetjie en wyfie uitgebroei word.