Belo Horizonte

vanuit Wikipedia, die vrye ensiklopedie.

Belo Horizonte
Kaart	Wapen
	Vlag
Land	Brasilië
Deelstaat	Minas Gerais
Koördinate	19°53' S, 43°56' W
Stigting	1701
Inkorporasie	12 Desember 1897
Oppervlak:
- Totaal	330,9 vk km
Hoogte bo seevlak	852 m
Bevolking:
- Totaal (2006)	2 438 526
- Bevolkingsdigtheid	4 781/vk km
- Metropolitaanse gebied	5 357 942
Tydsone	UTC -3
- Somertyd	UTC -2
Burgemeester	Fernando da Mata Pimentel (PT)
Amptelike Webwerf	belohorizonte.mg.gov.br

Belo Horizonte [bɛloɾiˈzõtʃi] - die Portugese naam beteken "mooi horison" - is die hoofstad van die deelstaat Minas Gerais in die Suidoostelike Streek van Brasilië met 'n bevolking van sowat 2,4 miljoen en die derde grootste metropolitaanse gebied in Brasilië met 5,4 miljoen inwoners. Belo Horizonte, wat in die omgangstaal volgens sy Portugese voorletters "BH" dikwels net "Beagá" genoem word, is die ekonomiese en kulturele sentrum van Minas Gerais, die vyfde grootste deelstaat van Brasilië.

Belo Horizonte lê in 'n heuwelagtige gebied met ryk afsettings van ysterterts, mangaan, chroom, goud en diamante. Minas Gerais se oorspronklike uitgestrekte bosgebiede het lankal die myn- en landbou ten prooi geval. Tans is Eukaliptus-plantasies die belangrikste bron van houtkole wat in die swaar nywerhede benodig word.

Die eerste nedersettings ín die gebied het in die vroeë 1700's ontstaan, maar die huidige stad is eers in die 1890's ontwerp en gebou om Ouro Preto as hoofstad van Minas Gerais te vervang. Belo Horizonte staan vandag onder meer vir die kontras tussen geskiedkundige en moderne geboue bekend en pronk met 'n groot aantal bekende voorbeelde van moderne Brasiliaanse argitektuur, waaronder veral die Pampulha-kerk (Portugees: Capela de São Francisco de Assis of Igreja da Pampulha), wat deur die bekende argitek Oscar Niemeyer ontwerp is.