Bùmmulu
Di Wikipedia, la nciclupidìa lìbbira.
Lu bùmmulu è nu cuntinituri di terracotta, ca na vota vinìa usatu pi jìnchìrilu di acqua e mantinìrila frisca ppi tutta la jurnata.
Havi la vucca stritta, spissu havi dù mànichi e nta la parti di sutta s'allarga e forma na speci di panza. Ppô vinu vinìa usatu, nveci, na varianti cchiù nicaredda dô bùmmulu, cu na furma tanticchia cchiù scacciata e chissu vinìa chiamatu ciascu.
Nta arcuni bùmmuli vinìa fattu o centru di la panza nu purtuseddu ntuppatu cu nu lignuzzu: di ssù purtusu si biveva.
[cancia] Picchì acqua o vinu si mantènunu frischi
Lu mètutu di lavurazzioni di lu mpastu ca s’usava ppi fari lu bùmmulu, era fattu di crita e sali assai travagghiatu: ssa terracotta fatta accussì, avìa la carrattirìstica ca era purosa e assai igruscòpica , e chissu ppi effettu dû sali.
Di sta manera, lu bùmmulu traspirava cuntinuamenti e furmava nta sò pareti sterna na pillìcula fina-fina di acqua; l’acqua, svapurannu, facìa calari la timpiratura nterna dô bùmmulu e lu lìquitu ca avìa d’intra si mantineva beddu friscu macari sutta ô suli dû misi d’austu.
[cancia] Centri di prudùzzioni
Lu centru cchiù mpurtanti pâ prudùzzioni di bùmmuli e quartari nta la Sicilia urientali era Lintini; àutri posti di prudùzzioni ntâ Sicilia uccidintali èranu Arcamu e Carini; bùmmuli boni vinìanu fatti macari a Cartanissetta, Calatafimi, Gela, Nicusìa, Licata, Patti e Terrasini.
[cancia] Forklori
Ora lu bùmmulu è usatu nnî li gruppi forklorìstichi siciliani pi fari spittàculu, nfatti ci sunnu dintra sti gruppi arcuni cristiani ca jèttanu stu bùmmulu nta l'aria, macari àutu assai, e doppu lu ripìgghianu senza fàrilu càdiri 'n terra.
Lu bùmmulu è videmma usatu comu strummentu musicali p'accumpagnari li tarantelli, nfatti li sunatura ci sciùscianu d’intra e crèanu nu sonu assai gravi ca havi la funzioni di nu vasciu; ppi pruvucari ssu tipu di sonu, lu sunaturi ci sciùscia nta na manera particulari, zoè ci fa comu na speci di pirnacchiedda ritmàtica ca veni amprificata e lu sò sonu addiventa cchiù vasciu ppi causanza dâ furma dû bùmmulu ca ci fa di cassa armùnica; ‘n basi a l’angulazzioni di la vucca di lu sunaturi, mentri ci fa la pirnacchedda, ccu la vucca dû coddu dô bùmmulu, lu sonu pigghia na sonurità cchiù o menu vascia e li sunatura cchiù bravi rinèsciunu macari a mudulari li toni e canciari li noti.
 |
Folklori sicilianu |  |
|---|---|---|
| Ciaramedda | Marranzanu | Friscalettu | Bùmmulu | Tammureddu | Carrettu sicilianu | Òpira dî pupi | Canzuni siciliani | | ||
