Nicolas Sarkozy
Vun Wikipedia
Nicolas Paul Stéphane Sarközy de Nagy-Bocsa (* 28. Januar 1955 in Paris), mehr bekannt unner sien korten Naam Nicolas Sarkozy is de hüdige Präsident vun Frankriek un de Mitförst vun Andorra. Sarkozy warrt faken ok mit sien Binaam Sarko ropen.
Inholtsverteken |
[ännern] Leven
De Vadder vun Sarkozy is Pál Sárközy Nagybócsai. He is vun Ungarn na Frankriek inwannert. Siene Mudder is Andrée Mallah. De ehr Vadder weer en sephardischen Joden ut Grekenland, de to’n kathoolschen Gloven övertreden weer. De Familie vun Sarkozy sien Vadder höör to den lüttjen Adel in Öösterriek-Ungarn to un seet up en lüttjet Slott in Alattyán bi Szolnok. As de Rode Armee 1944 in Ungarn inmarscheert weer, is de Familie utbüxt. Na’n Krieg keem se torüch, man de Kommunisten harrn dat ganze Wesewark midderwielen övernahmen un an sik reten. Dat duer nich lang un Nicolas sien Grootvadder is denn storven. Pál Sarközy änner denn sien Naam in Paul Sarközy de Nagy-Bocsa un wanner na Frankriek ut. Dor hett he denn Andrée Mallah drapen un hett sik befreet. Mit ehr hett he allerhand Kinner kregen, dormank Nicolas.
Nicolas is uptagen in dat XVII. Arrondissement. Dor besöch he de Cours Saint-Louis de Monceau. Dat is en kathoolsche Privatschool. Later studeer he an de Universität Paris-Nanterre un an dat Institut d'Etudes Politiques de Paris up Afkaat. He befaat sik besunners mit Bedrievsrecht un hett sik dallaten in Neuilly-sur-Seine. Dor is he denn in de Politik gahn.
[ännern] Froonslüde
An’n 23. September 1982 hett he sik befreet mit Marie-Dominique Culioli, wat de Dochter vun en Aftheeker ut Korsika weer. De beiden hefft twee Söhns mit’nanner harrt: Pierre (1985) un Jean (1987).
As Sarkozy 1984 Börgermeester in Neuilly weer, he he dor Cécilia Ciganer-Albéniz un den Feernsehmoderater Jacques Martin verheiraat. Ok de beiden hefft mit’nanner twee Kinner harrt: Judith Martin (1984) un Jeanne-Marie Martin (1987). Cécilia un Sarkozy füngen denn avers wat mit’nanner an un 1988 hett Cécilia ehren Ehmann verlaten un is mit Sarkozy tohopengahn. 1996 hefft de beiden denn freet. Ok ut düsse Eh hett dat en Kind geven: Louis, de 1997 boren is.
In dat Vörjohr 2007 is dor över snackt wurrn, dat dat mit jem ehre Eh nich allerbest lopen dö. Cécilia weer bi sien Wahlkampf för’n Präsidenten nich mit bi un stimm in de tweete Runn nich för em af. Bi en Staatsbesöök in de USA bi Präsident George W. Bush weer se man knapp to sehn un bi en annern Besöök in Libyen weer se gor nich mit bi.
An’n 18. Oktober 2007 hett de Èlysée-Palast bekannt maakt, dat de beiden an düssen Dag scheden wurrn sünd.
An’n 17. Dezember 2007 sünd in de franzöösche Press Fotos vun Präsident Sarkozy un dat Fotomodell Carla Bruni afdruckt wurrn. An’n 2. Februar 2008 hefft de beiden heiraat.
[ännern] Wie dat mit de Politik lopen is
[ännern] Neuilly-sur-Seine
Vun 1977 bit 1983 höör he to den Gemeenderaat vun düsse Pariser Vörstadt to. Vun 1983 bit 2002 is he dor Börgermeester ween.
[ännern] Europaparlament
Vun 1999 bit 2004 hett he in dat Europaparlament seten.
[ännern] Minister
2002 is Sarkozy to’n eersten Mol Minister wurrn. Dat is tämlich laat in sien Karriere un hett dor an legen, dat he sik mit sien Parteifründ, Präsident Jacques Chirac nich besunners verdragen hett. Sarkozy harr bi de Präsidentenwahlen in dat Johr 1995 in dat Lager vun Chirac sien Gegenspeler Éduard Balladur stahn.
Vun Mai 2002 af an is he dreemol Minister in en Regeern vun Jean-Pierre Raffarin wurrn. Bit März 2004 weer he Binnenminister. Denn is he Minister för Weertschup un Finanzen wurrn. In’n Harfst 2004 hett he Bott geven as Minister, vunwegen dat he nu Vörsitter vun de Partei UMP wurrn weer. Präsident Chirac harr em dormols dwungen, he scholl wählen, ob he nu Parteivörsitter oder Minister weern wull. As dat EU-Grundgesett vun de franzööschen Börgers aflehnt wurrn weer is he, wedder as Binnenminister, in de Regeern vun Dominique de Villepin intreden. De weer an de Steed vun Jean-Pierre Raffarin treden.
An’t Enn vun dat Johr 2005 nömm he de upsternaatschen Jugendlichen ut de Vörstäder vun Paris racaille, wat soveel, as „Affall“, „Schiet“ oder „Müll“ heten deit. Welke vun siene Gegners menen denn, he harr mit düt Woort bloß de Jugendlichen utschimpt, de nich vun franzöösche Öllern afstammen döen. Vundeswegen is in Frankriek denn veel snackt wurrn, wie dat mit de Frömden in dat Land utsütt. Veer Weken lang geev dat in dat Land jeden Avend Stratengewalt, Hüser un Autos brennen un de Nahverkehr weer jummers wedder angrepen. Sarkozy harr al vördem seggt, he wull dor mit en Hoochdruckreiniger dörgahn un kloor Schipp maken. He hett mit de Jugendlichen nich snackt, man hett dor gegenan bullert.
Sarkozy weer nich bloß Binnenminister, man ok Sekretär vun siene Partei UMP. He weer de UMP ehr eenzige Kannedat för de Wahlen to’n Präsidenten in dat Johr 2007. As Kannedat vun de Rechten streed he gegen Ségolène Royal,de vun de Sozialisten upstellt wurrn weer. An’n 26. März 2007 hett he Bott geven as Minister. He woll sik kunzentreern up den Wahlkampf to’n Präsidenten.
[ännern] Präsident
An un for sik is seggt wurrn, dat de Chancen vun Fro Royal grötter weern, as Sarkozy siene. De Schrieversche Yasmina Reza is een Johr lang mit em unnerwegens ween up siene Törns in’n Wahlkampf un hett dor en Book över schreven. Bi de eerste Runn vun de Wahlen an’n 22. April 2007 hett Sarkozy mit 31,18% vun de Stimmen den eersten Platz harrt vör Royal mit bloß 25,87%. In de tweede Runn an’n 6. Mai hett Sarkozy denn 53,06% kregen un Royal den Rest. Dor is he denn mit Präsident vun Frankriek wurrn.
Wählt is he vör fiev Johr. Ünner Eed nahmen wurrn is he an’n 16. Mai 2007. Dor is Sarkozy de 23. Präsident vun de franzöösche Republik mit un de sesste Präsident vun de Föffte Franzöösche Republik. He folg up Jacques Chirac, de düt Amt vun 1995 bit 2007 harrt hett.
