Pasaiako portua
Wikipedia(e)tik
Pasaiako portua Pasaiako (Gipuzkoa) badian hedatzen da, Pasaiako udalerrian eta Oarsoaldea eskualdean.
Euskal Herriko hirugarren porturik garrantzitsuena da, Bilboko eta Baionakoaren ondoren, eta Espainiar estatuko 16.a, urtero izandako kontenedore eta merkantzia trafikoan.
2005. urtean 4 milioi tona mugitu ziren portuan.
Eduki-taula |
[aldatu] Portuaren ezaugarriak
Pasaiako portuak beste portuk ez dituen ezaugarri bereziak ditu. Sarrerako kanalak 10 metroko sakonera dauka itsasbehera denean. Sakonera hori, etengabe mantentzen da eta ez da beharrezkoa izaten ondoa dragatzea. Portuko kaiek 5.200 metroko luzeera dute, euretatik 1.500 metro arrantzarako erabiltzen dira eta 3.250 metro iharduera komertzialetarako. Gainerantzeko kaiak untziak konpondu eta bestelako ihardueretarako erabiltzen dira.
Portuak 600.000 metro karratuko azalera dauka lehorrean eta 940.000 metro karratuko flotazio azalera. Herrerako auzoan, portuaren industriagunea kokatzen da. Pasai Donibanen dagoen portu zatian bien bitartean, ontziola bat dago. Gipuzkoan dagoen zentral elektriko bakarra Pasaiako portuaren lurretan aurkitzen da, Iberdrolaren zentral termikoa alegia. Zentralak sortzen duen kutsadura dela eta, hurrengo urteetan itxiko dela uste da.
[aldatu] Arrantza
1970eko hamarkada arte Pasaiako jarduera tradizionala izan zen. 1960ko hamarkada eta 1970eko hamarkadaren artean, bakailaoa arrantzatzen zuten 280 ontzi zeuden Pasaiako portuan. Arrantzan milaka pertsona aritzen ziren orduan. Urteek aurrera egin ahala, arrantzaren gainbehera etorri da, eta gaur egun 300 bat pertsona baino ez dira arrantzan aritzen, gehien bat baxurako itsasontzietan.
[aldatu] Pasaiako Superportua
 |
Artikulu edo sekzio honek etorkizunean gerta litekeen gertakari bati buruzko informazioa dauka. Edozein unetan aldatu litekeen informazioa da bertakoa. |
Portua txiki geratu dela eta, Espainiako sustapen ministerioak portua handitu nahi du. Horretarako, eta badia barruan tokirik geratzen ez delako, kanpoaldean portu berria eraikiko da. Proiektua "Pasaiako Superportua" izenarekin ezagutzen da. Egitasmo honen bitartez, kai berriak eraikiko dira, eta Pasaiako badia barruko kaiak beste iharduera ekonomikoetarako berreskuratuko dira.
Besteak beste, kirol portuak, etxebizitza berriak, parkeak, merkataritza guneak eta bestelakoak eraikiko dira, gaur egun portuarenak diren lurretan.
