Afro-asiatische Sprachen

Us der alemannische Wikipedia, der freie Dialäkt-Enzyklopedy

Die afro-asiatische Schbrooche si ä Schbroochfamilie, wo öbbe 375 Schbrooche derzue ghöre. Si wärde gschwätzt vo meh as 300 Millione Mensche in Nordafrika, Oschdafrika, Weschdafrika, Zentralsfrika und Südweschdasie. Früehner het män ä semitisch-hamitischi Schbrooche gsait.

[ändere] Underfamilie

Die afro-asiatische Schbrooche wärde in die Underfamilie iideilt:

• D Berberschbrooche, wo in Nordweschdafrika vo öbbe 5 Millione Mensche gschwätzt wärde
  • S Tamaschek vo de Tuareg in dr weschtlige Sahara. Si hai es eiges Alphabet mit 24 Buechschdabe wo vo dr altlibysche Schrift abschdammt. Es wird vo rächts nach linggs gschriibe.
  • S Zanaga in Mauretanie.
  • S Rifkabylische, s Beraber und s Schluch in Marokko.
  • S Kabylische in Algerie.
  • Verschiidnigi Dialäkt in Tunesie.
  • D Schbrooch vo de Guantsche uf de kanarische Insle, wo im 17. Johrhundert uusgschdorben isch.
  • S Libysche wo uusgschdorben isch.
• D Tschadschbrooche, wo in Nigerie, Niger, Tschad und Kamerun verbreitet si.
• S Ägyptische, wo in dr Form vom Koptische bis in d Neuziit vo de ägyptische Chrischte as Umgangsschbrooch bruucht worden isch. Die ägyptische Schbrooche uusser em Koptische si mit Hieroglyphe odr mit dr hieratische Schrift gschriibe worde. S schböötere Neuägyptisch isch mit dr demotische Schrift gschriibe worde.
  • S Altägyptische.
  • S Middelägyptische
  • S Neuägyptische
  • S Koptische wird hüt mänggisch in dr chrischdlige Liturgie no bruucht. Es wird mit emä erwiiterete griechische Alphabet gschriibe.
• Die kuschitische Schbrooche wo im Horn vo Afrika gschwätzt wärde.
  • Die zentralkuschitische Schbroche in Äthiopoie und Eritrea
  • Die oschdkuschitische Schbrooche drunder Oromo, Somali, Sidamo, Saho, und Afar
  • Die südkuschitische Schbrooche drunder Aasáx, Iraqw-Alagwa, Burunge, und mögligerwiis Dahalo
  • Mänggisch wird au d Bedschaschbroch drzue zellt.
• Die omotische Schbrooche us Äthiopie, wo mänggisch zue de kuschitische Schbrooche zellt wärde
• D Bedschaschbrooch vo de Nomade z Ägypte, Sudan und Eritrea
• Die semitische Schbrooche us Südweschdasie und Äthiopie, und hüt au im nördlige Afrika wiit verbreitet.