Tswanas

vanuit Wikipedia, die vrye ensiklopedie.

[wysig] Geskiedenis

'n Tlhapingkaptein en sy vrou, soos waargeneem deur eerw. John Campbell by "New Lattakoo" (Kuruman) in die eerste helfte van die 1800's.

Bophuthatswana (Noordwes-provinsie van Suid-Afrika) - 'n voormalige republiek, alhoewel nooit internasionaal as sodanig erken nie - was die wetlik aangewese tuisland van die Republiek van Suid-Afrika se Tswana-bevolking. Volgens hul geskiedenis het hulle hul huidige tuisland waarskynlik al teen 1600 AD bewoon. Dit word beweer dat die Kgalagadi die eerste groep was om die binneland van Suid-Afrika binne te dring en die hedendaagse BaRolong- en BaThlaping-groepe het hulle gevolg. Die derde groep wat hulle in die gebiede van die huidige Rustenburg en Brits gevestig het, was die BaHurutse-BaKwena. Met die vasstelling van die westelike grens van die Transvaal in 1881, is die Tswana-groepe in twee verdeel: diegene wat nou in Botswana woon and diegene wat hulle in die noordwestelike streke van Suid-Afrika gevestig het. Die geskiedkundige nagedagtenis van hierdie Wes-Sotho-volk is te vinde in hul nedersettings, omring met klipmure, waarvan verskeie kapteinsgebiede soos Kaditshwene, Molokwane en Mabyanamatshwana deur die Noordwes-provinsie versprei lê.

[wysig] Vandag

Die Tswana is dié groep onder die Sotho's wat die heel westelike gedeelte van Suid-Afrika en Botswana betrek. Die Tswana behels verskeie groeperings, waarvan die belangrikste die Hurutshe, Kgatla, Kwena, Rolong, Thlaping en Tlokwa is. Alhoewel die Tswana die dominante etniese identiteit in Botswana is, word die land se hele bevolking gekenmerk as BaTswana, ongeag hul etniese oorsprong. Alhoewel geen amptelike poging nog ooit aangewend is om die bevolking volgens etniese oorsprong te tel nie, is minder as die helfte van die bevolking waarskynlik "etnies Tswana" van oorsprong.