Diccionaire di Tot l' Walon
Èn årtike di Wikipedia.
Li Diccionaire di Tot l' Walon ou DTW (prononcî détéwé), c' est on pordjet k' a stî enondé pa Johan Viroux diviè 1992 (so l' alomåcion DJW, Dicsionêre jènèrâl do walon). Mins gn a måy yeu li Lorint Hendschel eyet Tiri Dumont k' ont tapé, podbon, ene cåkêye d' intrêyes, eyet les cossemer emey les waloneus. Li pordjet c' est di ramexhner tos les mots walons di tos les motîs walons k' egzistèt, eyet d' endè fé ene båze di dnêyes infôrmatike ki permete des sûtis rcweraedjes et des studiaedjes so les mots.
Tiri Dumont aveut ddja fwait ene saye so aspougneu d' tecse so les N e 1993. Adonpwis, il a fwait les B, ene pårtêye des C et les D. Lorint Hendschel a fwait les A et ene pårteye des C. Lucyin Mahin a bouté so les Z e 1997.
Li fond di dnêyes a stî metou so les fyis, avou ene eterface waibe po fé des cweraedjes, pa Lorint Hendschel e 2001. Poy baguer sol sierveu da Pablo Sarachaga e 2003.
I gn a pus d' 37.504 intrêyes ki covrèt les letes A, B, C, D, E et sacwantès intrêyes plik plok dins les ôtès letes. Avou les N (nén sol fond di dnêyes mins so ene pådje zels tot seus, ça fwait cåzu 40.000 foyous.
Li cweraedje si pout fé so l' mot walon e rfondou (mins tot n' a nén co stî rcoridjî), oudonbén so les scrijhaedjes Feller (d' après les scrijhaedjes dins les motîs rwaitîs), ou co dins l' definixha (çoula permete a pô près di sayî des rcweraedjes so des mots francès po trover les mots walons). Li cweraedje pout eployî des erîlêyès ratourneures SQL po fé des spepieus rcweraedjes.
Asteure, Lucyin Mahin fwait co on cint d' mots tos les moes (totavå l' ôre alfabetike), eyet les tiper so on ridant d' l' Aberteke. I les rmete eto dins l' grand fitchî sourdant, sol cogne d' on tåvleu, aberwetåve.
E 2006, Pablo Sarachaga a rmetou totes les dnêyes eshonne, les Z et les N, avou. Il a prezinté les rfondowès cognes des mots ki li rfondaedje aveut ddja stî bén studyî. Il a radjouté des hårdêyes eviè l' esplicant motî, po les mots k' estént ddja eplaidîs laddé.
Li DTW est on mwaisse sourdant pol construjhaedje di l' esplicant motî eyet po l' ovraedje tecnike del Tåvlotêye Rifondaedje del Rantoele.
[candjî] Hårdêyes difoûtrinnes
- Prezintaedje e francès so l' Aberteke
- Li DTW so les fyis, po cweri après des mots k' î sont ddja.
- Fitchî sourdant (tåvleu) (aberwetåve, modêye 2007-04-04)
- Li lete N (fitchî HTML, modêye 1994)
