Ancyin Bedje
Èn årtike di Wikipedia.
Les Ancyins Bedjes (on dit eto: les Gålwès, et asteure, pus voltî, les Celes), c' est les djins ki dmorént el Gåle Beldjike djusse divant les Romins, dj' ô bén: do 5inme sieke å 1î sieke divant Djezus-Cri.
I djåzént li gålwès, on lingaedje gayel.
I shuvént li rlidjon des Celes, eto, po les crustins, il estént payins. Did la, l' aloumåcion did dinltins: les Sarazins
Li mot ni s' divreut nén apliker ås omes des cavienes, li peupe preyistorike ki vikéve divant zels avårci, 2500 ans divant Djezus-Cri.
Li mot a eto des ôtes sinses.
[candjî] Les peupes di l' Ancyinne Beldjike.
Li Gåle Beldjike, c' esteut tos l' payis a Bijhe di Sinne et d' Måne, et å Coûtchant do Rin. Sambe et Mouze fôrmént dedja li schrene di ç' payis la, ki corespond al Beldjike, l' Olande (a Nonne do Rin djuzrin), li Tchampagne eyet l' Picårdeye d' asteure. Gn aveut la ene grosse dozinne di peupes, mins so çou ki va divni l' Walonreye, c' esteut:
- Les Eburons: edjîstrés do costé d' Lidje et l' Limbork.
- Les Condruzes: ki dmorént sol Condroz et l' Hôte-Årdene.
- Les Trevires, ki viként sol Basse-Årdene (et l' Lussimbork).
- Les Nervyins, do costé do Roman Payis.
- Les Adouwatikes, metous paddé Nameur.
- Les Atrebates, k' ocupént l' Hinnot.
Dins çou ki va divni l' Flande, gn aveut les Morins et les Menapyins.
Les Ancyins Bedjes estît loukîs, pa Djule Cezår, come les pus coraedjeus di tos les peupes del Gåle:
- "Les pus fels des troes peupes des Gåles, c' est les Bedjes, paski c' est zels ki sont metous li pus lon erî del Province rominne, et des plaijhis del civilizåcion. Les martchands n' î alèt nén beacôp, et, dabôrd, n' î fjhèt nén moussî çou ki rind les djins nawes. Eto, pask' i sont les pus addé les Tîxhons, ki dmornut djudla Rin, et ki sont tofer e margaye avou zels" (Cezår, Li Guere des Gåles, I, 1).
[candjî] Tchîfs istorikes des Ancyins Bedjes
- Bodouwogna : tchîf des Nervyins, batou pås Romins, mins nén a Préle, come li vout on floriconte.
- Ambiyorisse : tchîf des Eburons ki va ataker les Romins, mins va piede, et s' aler catchî dins les bwès d' Årdene.
