Founteintjes
Uit Wikipedia
De Fonteintjes zyn een reekse van deels kunstmoatige, deels nateurlikke duneplassn, dunerietlandn en dunestruukn geleegn langst een 4 km lange stroke tusschn de dunegordel en de kustboane van Zêebrugge noa Blanknberge. Ondanks under ligginge vlak by de zee, en ze zoet woater. Vandoar de noame “Fonteintjes”. ’t Woater komt uut de grond.
’t Styf zeldzoam milieu zorgt vor een uutzonderlikke plantngroei. In 1868 schryft Crepin, één van de grotste Belgische plantkundign: “ces prairies sont les plus intéressantes de tout le littoral”, de interessantste van heel de kust. Surtout de vele soortn orchideeën zyn uutzonderlik.
De zes nu nog overbluuvnde depressies (leger geleegn gebiedn), zyn van mekoar gescheidn deur dwarsdyksjes die terzelfdertyd ook als toegangsweg noa ‘t strange fungeern. Vanof ‘t wandelpad ip de Groaf-Jansdyk e je een goed overzicht over heel ’t gebied, de zee en de achterliggende polders. Informoatiebordn zorgn vo den nodigen uutleg. De vier depressies vanof Zêebrugge vormn ‘t eigentlikke reservoat beheerd deur Natuurpunt vzw. Ze zyn allene moa toegankelik onder begeleidinge van e gids. Ipvallnd is de ofwisselinge van biotoopn binn zuk ‘n relatief kleen gebied.
[bewerkn] Wandelinge
- Een wandelinge start an den eeste vyver, ‘t Eendefonteintje in Zeebrugge. Die plas is kunstmoatig uutgegroavn. Allene moa an de landkant ist er nog riet. Tusschn de vyvers en de kustboane ligt er een wilgnbusje. An de dunekant was ‘t helegans geërodeerd deur overbetredinge en de begroeiinge was bykan totoal verdwenen. Vo da proces definitief were te droaien is ‘t gebied ofgeslootn. Nu is ‘t ‘erstelproces vulip bezig.
- Da kustverdediginge en nateurbeheer perfect tegoare kunn goan wordt dudelik by ‘t twidde 'Fonteintje'. De duunn zyn veel ‘oger en d’r is een echt bus ontwikkeld. ‘t Orchisfonteintje dankt z’n noame an z’n styf ryke vegetoatie lik Vleeskleurige Orchis, Rietorchis, Moeraswespnorchis en de styf zeldzoame Byenorchis. 's Winters stoan d’r grote deeln van t relatief droge kruudnryke en oorspronkelik kalkachtig dunegrasland onder woater. 's Zomers bluuft allene moa in ‘t oostelik deel een klene ondiepe plas over.
- 't Busfonteintje toogt e heel ander beeld: in den oostelikkn ‘elt vind je oopn woater me rietveldjes d’r rond en in den ‘oek e wilgenbusje. An de westelikkn ‘elt ist er een droger gedeelte met e kruudnryke duunrietvegetoatie en e moerasbusje me Wilg en Sleedoorn. De dunevoet is dichtbegroeid me Vlier en Witte Abeel en in mindere moate me Duindoorn.
- De Rietfontein, ‘t latste ofgeslootn reservoatgedeelte, bestoat uut uutgestrekte rietveldn met in ‘t centrum twi plekkn oopn woater me Kleine Lisdodde d’r rond. Ieder seizoen zyn d’r typische rietveugels, lik rietgors en blauwborst. An de dunevoet groeit er were Wilg, Vlier en Duundoornstruukn.
De latste twi vyvers zyn ook visvyvers. Ze zyn alletwee uutgegroavn rond 1860 ter versteviginge van de Groaf-Jansdyk waarip da de spoorweg noa Knokke angeleid is.
An de zeekant wordt ‘t zand vastegeleid deur ‘t stevige Helmgras. An de kant meer landinwoarts van de duunn is den invloed van de wind al veel klinder. Doa zie je ip vele plekkn Duindoornstruukn en de uut China ofkomstige Rimpelroos, die nu ingeburgerd is in uze duunn.
’t Is ook ’n plekke die vele trekveugels antrekt. En ‘t stik oopn ruumte is ook ‘n buffer tusschn Blanknberge en d'oaven van Zeebrugge.
