Kanisa la Kaburi na Ufufuo wa Yesu
Kutoka Wikipedia
Kanisa la Kaburi na Ufufuo wa Yesu liko mjini Yerusalemu mahali ambako kufuatana na mapokeo ya kikristo Yesu alisulibiwa, kuwekwa kaburini na kufufuka siku ya tatu.
Kanisa hili laitwa "Kanisa la ufufuo" na Wakristo wenyeji Waorthodoksi (Kar.: كنيسة القيامة kanisat-al-qiyama) na "Kanisa la Kaburi" kwa lugha nyingi za Ulaya. Kufuatana na mapokeo ya mahali mwamba wa Golgota uliposimama msalaba wa Yesu na kaburi alikozikwa vyote vilikuwa karibu sana hivyo mahali pote pawili hufunikwa na jengo lilelile.
[hariri] Historia ya jengo
Habari za kwanza zapatikana kutoka kwa Eusebio wa Kaisaria (275 – 339) aliyeandika ya kwamba mahali pa kaburi la Yesu lilifunikwa na hekalu ya Apollo mungu mmojawapo wa Kiroma na hii huaminiwa ilitokea baada ya mwaka 135 mji wa Yerusalemu ulipotangazwa kuwa mji wa Kiroma na Wayahudi walikataliwa wasiingie tena. Kaisari Konstantino aliagiza mahali pafunuliwe tena na kanisa la kwanza kujengwa juu ya kaburi. Kanisa hili lilibomolewa na Waajemi waliovamia Yersalemu mwaka 614. Likatengenezwa chini ya Kaisari Heraklio mnamo 630 likaheshimiwa na Waarabu Waislamu walioteka mji mwaka 637. Kanisa lilibomolewa kabisa mara ya pili mwaka 1009 chini ya khalifa Al-Hakim bin-Amr Allah wa Misri.
Likajengwa upya wakati wa vita ya misalaba mwaka 1149 na watawala wamisalaba. Baada ya kufukuzwa kwa Wamisalaba jengo lilikabidhiwa na Waislamu kwa watawa Wafransisko ambao ni Wakatoliki.
[hariri] Ushirikiano wa madhehebu
Katika karne za baadaye yakafuata mavutano kati ya madhehebu mbalimbali hasa Wakatoliki na Waorthodoksi. Tangu karne ya 19 kuna namna ya ushirikiano kati ya Waorthodoksi Wagiriki, watawa Wafransisko na Waorthodoksi wa Armenia. Waorthodoksi wa Siryani, wa Kopti na Wahabeshi hushirikiana pia. Ufungu hutunzwa na familia ya Kiislamu.
